Міжнародная праваабарончая арганізацыя Amnesty International і Беларуская Рада культуры абвесцілі сумесную акцыю ў падтрымку 17-гадовага палітвязня Мікіты Залатарова, асуджанага на 4,5 гады калоніі.
Асноўная ідэя акцыі – паштоўкі, якія дапамогуць пашырыць інфармацыю пра сітуацыю Мікіты, звярнуць увагу на лёс няпоўнагадовага палітвязня, а таксама падтрымаць юнака.
Ініцыятары кампаніі звяртаюцца найперш да мастакоў і просяць іх маляваць паштоўкі, падпісваць сваім імем ці псеўданімам і ў электронным выглядзе дасылаць на адрас: eurasia@amnesty.org. А саму паштоўку па магчымасці лепш даслаць наўпрост Мікіце па адрасе: Выхаваўчая калонія №2, вул. Батава, 4, г. Бабруйск, 231800, Магілёўская вобласць.
Таксама кожны можа далучыцца да петыцыі аб вызваленні Мікіты.
Мікіта Залатароў быў затрыманы 11 жніўня 2020 году ў Гомлі. На той момант падлетку было 16 гадоў. Яго абвінавацілі паводле трох артыкулаў: ч. 1 арт. 293 КК РБ («Арганізацыя масавых беспарадкаў»), арт. 364 («Гвалт альбо пагроза ўжывання гвалту ў дачыненні да супрацоўніка органаў унутраных справаў»), арт. 295 («Незаконныя дзеянні ў дачыненні да агнястрэльнай зброі, боепрыпасаў і выбуховых рэчываў»).
ГГ, belsat.eu