Сацыяльная сетка Twitter адкладзе ўвядзенне платнай сістэмы верыфікацыі акаўнтаў да завяршэння прамежкавых выбараў у Кангрэс ЗША, паведамляе газета «The New York Times» са спасылкаю на крыніцы. Баяцца ўмяшання ў выбары.
«Twitter адкладае разгортванне сістэмы падпіскі для верыфікацыі карыстальнікаў за $ 7,99 на месяц да завяршэння прамежкавых выбараў у аўторак», – піша выданне.
Раней Ілан Маск прапанаваў увесці платную сістэму верыфікацыі акаўнтаў сацыяльнай сеткі за $ 8 за месяц.
Паведамляецца, што падставаю для таго, каб перанесці тэрміны ўвядзення платнай сістэмы верыфікацыі, сталіся пярэчанні карыстальнікаў і працаўнікоў Twitter, звязаныя з магчымым злоўжываннем функцыяй напярэдадні выбараў.
«Карыстальнікі змогуць лёгка ствараць верыфікаваныя акаўнты, напрыклад, выдаючы сябе за прэзідэнта Байдэна, заканадаўцаў або выданні навінаў, і публікаваць ілжывую інфармацыю», – піша газета са спасылкай на інфармацыю сваіх суразмоўцаў.
«The New York Times» прыводзіць таксама паведамленне аднаго з працаўнікоў Twitter са службовай перапіскі, у якім ён задаецца пытаннем аб неабходнасці ўводзіць «настолькі рызыкоўную змену перад выбарамі, якая можа прывесці да ўмяшання ў выбары». У выніку сацсетка, як чакаецца, запусціць платную сістэму пацверджання асобы на наступны дзень пасля дня адзінага галасавання, то бок 9 лістапада.
У асноўны дзень галасавання на прамежкавых выбарах, 8 лістапада, у абедзве палаты Кангрэсу ЗША павінны абраць усіх 435 чальцоў Палаты прадстаўнікоў і 35 са 100 сенатараў.
Угода аб набыцці Twitter за $ 44 млрд была канчаткова закрытая напрыканцы кастрычніка. Ілан Маск абяцаў лібералізаваць рэдакцыйную палітыку сацыяльнай сеткі.
Антон Тачняк belsat.eu
