Памежная служба Латвіі абвінаваціла беларускіх калегаў у дапамозе мігрантам. Яны, нібыта, дапамаглі зрабіць адтуліну ў плоце, праз якую мігранты змаглі трапіць на тэрыторыю Латвіі, а пасля зачынілі яе. Інцыдэнт адбыўся 6 жніўня.
Латышскія памежнікі, вывучыўшы запісы з камераў відэаназірання, прыйшлі да высновы, што праз дзірку на тэрыторыю Латвіі былі запушчаныя з Беларусі чацвёра мігрантаў. Прычым перабірацца ў Еўразвяз ім дапамагалі беларускія памежнікі.
«Прадстаўнікі ўладаў Беларусі дапамаглі нелегалам пераадолець плот, пераціснуўшы дрот у канструкцыі плота, а пазней закрылі дзірку ў плоце, каб мужчыны, якія нелегальна трапілі ў Латвію, не вярнуліся ў Беларусь», – паведамілі латышскія памежнікі.
Адзначаецца, што мігранты былі затрыманыя і выдвараныя з Латвіі.
Сёлета ў траўні начальнік Дзяржаўнай памежнай аховы Латвіі Гунтыс Пуятс (Guntis Pujāts) распавядаў пра выпадкі, калі ўлады Беларусі прапаноўвалі агнястрэльную зброю нерэгулярным мігрантам, якія збіраліся перайсці беларуска-латышскую мяжу. Аднак мігранты адмаўляліся браць зброю, таму пакуль ніякіх інцыдэнтаў з ужываннем зброі супраць латышскіх памежнікаў не было зафіксавана.
Таксама Латвія будзе паскараць будаўніцтва агароджы на мяжы з Беларуссю. Работы на першым участку плануюць завяршыць ужо ўвосень.
Алена Рувіна belsat.eu