Міжнароднае бюро міру абвесціла, што прапануе на Нобэлеўскую прэмію міру 2024 года тры арганізацыі, якія адстойваюць права на адмову ад вайсковай службы паводле матываў сумлення. Сярод іх – беларускі «Наш дом».
На Нобэлеўскую прэмію міру таксама вылучаць «Движение сознательных отказчиков от военной службы» з Расеі і Украінскі пацыфісцкі рух.
Рашэнне вылучыць гэтыя тры арганізацыі – сведчанне іх непахіснай адданасці справе адстойвання права на адмову ад вайсковай службы з меркаванняў сумлення ды прасоўвання правоў чалавека і міру ў сваіх краінах, гаворыцца ў заяве Міжнароднага бюро міру.
«Нават перад абліччам эскалацыі пагроз тры рухі настойваюць на сваёй прыхільнасці дапамагаць людзям, якія супраціўляюцца вайне і мабілізацыі. Мы цвёрда верым, што гэтыя арганізацыі – найбольш вартыя кандыдатаў на гэтае прэстыжнае прызнанне», – гаворыцца ў заяве бюро.
Таксама адзначаецца, што актывісты «прадэманстравалі беспрэцэдэнтную дасканаласць і самаадданасць у сваіх намаганнях, нягледзячы на значную стыгматызацыю, з якой сутыкнуліся з пачатку вайны ва Украіне».
Міжнароднае бюро міру – інтэрнацыянальны рух, заснаваны ў 1891 годзе. Ён прасоўвае ідэю пацыфізму.
Арганізацыя «Наш дом», якую ўзначальвае Вольга Карач, падкрэсліла, што рашэнне Міжнароднага бюро міру – знак прызнання антываеннай дзейнасці і дапамогі беларусам, якія адмаўляюцца ад службы з меркаванняў сумлення.
Летась «Наш дом» абвясціў кампанію «НЕ значыць НЕ» дзеля таго, каб беларускае войска не было ўцягнутае ў вайну ва Украіне. Праваабаронцы дапамагаюць беларусам, якія не хочуць ісці ў войска і не хочуць ваяваць ва Украіне, гаворыцца ў паведамленні арганізацыі.
Летась Нобэлеўскую прэмію міру атрымаў старшыня праваабарончага цэнтру «Вясна» Алесь Бяляцкі, а таксама расейскі праваабарончы цэнтр «Мемарыял» і ўкраінскі Цэнтр грамадзянскіх свабодаў.
У 2021 годзе былі ўзнагароджаныя галоўны рэдактар расейскай «Новой газеты» Дзмітрый Муратаў і філіпінская журналістка Марыя Рэса (Maria Ressa).
Сяргей Крот belsat.eu
