7 ліпеня ў Беларусі падыходзіць да заканчэння 333-і дзень няспыннага пратэсту беларусаў супраць гвалту ўладаў і фальсіфікацыі выбараў. Падводзім яго вынікі.
Дыпламатычны скандал працягваецца
Сёння працягнуўся дыпламатычны скандал паміж Вільняй і Менскам. Афіцыйныя ўлады Беларусі напярэдадні запатрабавалі скараціць персанал дыпламатычнага прадстаўніцтва Літвы. Ім не спадабалася наданне літоўскім бокам дыпламатычнага статусу офісу Святланы Ціханоўскай.
У адказ сёння Вільня запатрабавала аналагічных крокаў ад беларускіх дыпламатаў. У ЕЗ нагадалі, што гэты і падобныя папярэднія крокі афіцыйнага Менску б’юць перадусім па грамадзянах Беларусі і пазбаўляюць магчымасці камунікацыі ў крызіс.
Літва між тым незадаволеная не толькі паводзінамі беларускага МЗС, але і мігранцкім крызісам. З пачатку года ўжо затрымана амаль 1,5 тыс. нелегальных мігрантаў з краін Азіі і Афрыкі, якія спрабуюць праз Беларусь патрапіць у суседнюю краіну. Цяпер Вільня плануе паслаць на мяжу войскі, а саму яе ўмацаваць фізічнымі бар’ерамі.
Паміж санкцыямі ды рэпрэсіямі
Новыя санкцыйныя бар’еры з’яўляюцца паміж Менскам і іншымі краінамі. Гэтак, чацвёрты пакет санкцыяў Еўразвязу за апошнія дні падтрымалі так ці інакш Албанія, Ісландыя, Ліхтэнштэйн, Нарвегія, Паўночная Македонія, Чарнагорыя, Швейцарыя і нават часткова Сербія. На падыходзе з прыняццем першага і другога пакетаў санкцыяў ЕЗ Украіна.
Святлана Ціханоўская між тым абвясціла пра падрыхтоўку візітаў у Ірландыю і ЗША, якія тым часам забаранілі продаж авіяквіткоў у Беларусь.
Улады ў сваю чаргу працягваюць рэпрэсіі – затрымліваюць журналістаў, выдаюць содні актывістам і раскручваюць крымінальныя справы. Ідуць і масавыя праверкі грамадскіх арганізацыяў.
А што ў свеце?
А ў свеце адной з галоўных навінаў стала забойства ў сваім доме прэзідэнта Гаіці Жавенэля Маіза і ягонай жонкі. Пратэсты ў краіны ішлі з мінулага года, а на кіраўніка краіны яшчэ ў 2018 годзе рабілі замах.
Сам ён хоць і кіраваў толькі з 2017 года, але ўжо паспеў распусціць парламент, уступіць у канфлікт з судовай уладай і збіраўся правесці рэферэндум, які б яшчэ больш пашырыў ягоныя паўнамоцтвы.
МГ belsat.eu
