5 ліпеня часовага паверанага ў справах Беларусі ў Польшчы выклікалі ў польскае МЗС у сувязі са знішчэннем магілы жаўнераў Арміі Краёвай у беларускай вёсцы Мікулішкі. Пра гэта паведамілі ў польскім міністэрстве.
У Варшаве абураныя паведамленнямі пра знішчэнне могілак на рэкамендацыю ўладаў Беларусі. Там нагадалі, што ў 1944 годзе жаўнеры Арміі Краёвай, часткі Войска Польскага, падчас аперацыі «Вострая брама» змагаліся за вызваленне Вільні ад нямецкай акупацыі і «заплацілі за гэта самы высокі кошт». А цяпер напярэдадні гадавіны аперацыі «беларускі бок робіць гэты беспрэцэдэнтны напад».
Варшава называе інцыдэнт ганебным і лічыць, што гэта прыклад парушэння беларускімі ўладамі ўсіх абавязкаў у адносінах мемарыяльных аб’ектаў на тэрыторыі Беларусі.
«Гэта нагадвае самыя змрочныя старонкі гісторыі камунізму, і, з увагі на больш раннія паведамленні пра знішчэнне польскіх вайсковых пахаванняў, не можа ўспрымацца інакш як наўмысная акцыя дзеля далейшага пагаршэння ўзаемаадносінаў паміж Польшчай і Беларуссю», – заяўляе МЗС Польшчы.
Паводле яго, рэжым Лукашэнкі чыніць антыпольскую кампанію, «абумоўленую імкненнем сцерці сляды польскасці ў Беларусі».
4 ліпеня стала вядома, што магілы жаўнераў Арміі Краёвай у Мікулішках на Гарадзеншчыне зраўнялі з зямлёй.
Мемарыял у Мікулішках – гэта магілы жаўнераў 1-й, 3-й і 6-й брыгадаў Арміі Краёвай Віленскай акругі, якія загінулі ў 1944 годзе. У цэнтры мемарыялу быў усталяваны крыж, паабапал якога – 22 крыжы ў два шэрагі з імёнамі палеглых.
Мемарыял быў адкрыты і асвячоны ў чэрвені 1992 года. Доўгі час ім апекавалася жыхарка Мікулішак Юзэфа Пяткевіч, а апошнія гады – актывісты СПБ з Ашмянаў і Смаргоні.
Якуб Хруст belsat.eu