«Хопіць гвалціць». На акцыі памяці забітай у Варшаве беларускі зладзілі хвіліну крыку
У цэнтры Варшавы адбылася акцыя супраць гвалту ў памяць аб забітай беларусцы Лізаветы, перадае карэспандэнт «Белсату». На месцы злачынства на вуліцы Журавей прайшоў мітынг. Там удзельнікі зладзілі хвіліну крыку – крычалі за дзяўчыну, бо яна не змагла.
Акцыя называлася «Яе звалі Ліза». Дэманстрацыя прайшла з ініцыятывы беларускіх актывістак, а таксама польскіх ды ўкраінскіх арганізацыяў.
Феміністка Наста Базар падчас прамовы на мітынгу сказала:
«Ліза памерла ў цішыні, таму што яна не магла крычаць. Таму сёння мы будзем крычаць за яе. А потым мы пойдзем у цішыні, каб паказаць, што не заўсёды маўчанне з’яўляецца згодаю».
«Гвалт недапушчальны. Гэта наш жэст, каб заклікаць, каб мы не былі абыякавымі, не праходзілі міма», – падкрэсліў кіраўнік Народнага антыкрызіснага ўпраўлення Павел Латушка, які таксама ўзяў удзел у дэманстрацыі.
Людзі прыйшлі на акцыю з плакатамі «Хопіць гвалціць!», «Я проста ішла дадому», «Мы не хочам болей баяцца».
На месцы злачынства на вуліцы Журавей людзі запальвалі знічы і ўскладалі кветкі. Пасля мітынгу ўдзельнікі рушылі па цэнтральных вуліцах Варшавы да Палаца культуры і навукі.
Злачынства адбылося 25 лютага. Паводле версіі следства, 23-гадовы хлопец кінуўся на Лізавету з нажом, прыціснуў да брамы, душыў і згвалціў. Беларуску выратаваць не ўдалося: праз некалькі дзён яна памерла ў шпіталі.
Цяпер трывае збор грошай на пахаванне і адвакатаў для пацярпелага боку. Бацька падазраванага заявіў, што «не пакіне сваё дзіця» і што не можа ўявіць, што ягоны сын усё астатняе жыццё правядзе за кратамі.
Пахаваюць Лізавету ў Варшаве, імаверна, 14 сакавіка.
Сцяпан Кубік belsat.eu
