Міністр абароны Нарвегіі Б’ёрн Арыль Грам заявіў, што ў краіне існуе вострая неабходнасць у буйных інвестыцыях у абарону, каб быць гатовымі да магчымага канфлікту з Расеяй нават пасля сканчэння вайны ва Украіне, піша выданне «Verdens Gang».
Рыхтавацца трэба ўжо цяпер, каб пры патрэбе своечасова адрэагаваць, лічыць Б’ёрн Арыль Грам, бо Расея ніколі не будзе такой, як еўрапейскія дзяржавы, расткі дэмакратыі ў ёй былі знішчаныя.
«Мы павінны разумець, што зародкі шляху Расеі да дэмакратыі пасля падзення камунізму даўно задушаныя. Няма ніякіх прыкметаў таго, што Расея будзе такой жа, як мы… – сказаў міністр абароны Нарвегіі. – Тых нешматлікіх расейцаў, якія наважваюцца пратэставаць, кідаюць у турму ці адпраўляюць на вайну. Там іх выкарыстоўваюць як гарматнае мяса. Там няма апазіцыі, няма свабоды прэсы, няма грамадзянскай супольнасці, якая магла б супрацьстаяць аўтарытарнаму рэжыму».
Такая Расея, паводле нарвежскага чыноўніка, «застанецца з намі надоўга», у сувязі з чым нават пасля завяршэння вайны ва Украіне пагроза застанецца. Міністр мяркуе, што Расея можа змяніць свае планы і размяшчэнне сілаў пасля ўступлення ў NATO Фінляндыі і Швецыі, таму заклікаў павялічыць інвестыцыі ў абарону і вайсковыя вучэнні.
Імавернасць нападу Расеі на Еўропу аналізаваў былы камандзір арміі ЗША ў Еўропе, генерал-лейтэнант у адстаўцы Бэн Годжэз. На ягоную думку, канфлікт можа здарыцца да 2044 года. У сувязі з гэтым важна мець адэкватную супрацьпаветраную і супрацьракетную абарону ўва ўсёй Еўропе, лічыць былы вайсковец.
Аналітыкі Нямецкай рады замежнай палітыкі (DGAP) яшчэ летась падрыхтавалі спавешчанне, у якім называюць ваенную агрэсію Расеі супраць краінаў NATO практычна непазбежнаю.
Марыя Міхалевіч belsat.eu
