Аляксандр Лукашэнка 6 лютага падпісаў указ, які закранае пытанні вяртання ў краіны палітычных уцекачоў ад рэпрэсіяў у Беларусі. Пра гэта паведамляе «Пул Первого».
Паводле тэлеграм-каналу, згодна з указам будуць разглядацца «звароты грамадзянаў Беларусі, якія ўчынілі правапарушэнні».
«Гэтае пытанне трэба здымаць у грамадстве. Патрэбная развязка», – сказаў Лукашэнка на сустрэчы з генеральным пракурорам.
«І трэба глядзець не толькі збеглых. Хтосьці з-пад плінтуса вылезе – яны ж разумеюць, што мы іх усё роўна знойдзем. Хтосьці звернецца ў камісію. Вы ў камісіі ўжо разберацеся», – дадаў Лукашэнка.
У склад камісіі ў тым ліку ўвайшлі людзі, якія нібыта пацярпелі ў выніку правапарушэнняў.
«Натуральна, што мы гэта павінны арганізаваць і быць галоўнымі дзейнымі асобамі», – заявіў Лукашэнка.
Пры гэтым ён анансаваў вялікую нараду з сілавікамі, каб «пагутарыць адкрыта пра задачы і недахопы».
24 студзеня стала вядома, што ўлады Беларусі ствараюць міжведамасную камісію, якую ўзначаліць генеральны пракурор. Камісія будзе разглядаць пытанні беларусаў, якія пасля падзеяў 2020 года выехалі з краіны, а цяпер жадаюць вярнуцца.
«Тыя, хто цяпер за мяжою і жадае вярнуцца на радзіму, але чагосьці баіцца, будуць мець магчымасць звярнуцца (інфармацыя будзе размешчаная ўва ўсіх сродках масавай інфармацыі) у камісію і атрымаць адпаведныя тлумачэнні – пра магчымасць вярнуцца, наяўнасць або адсутнасць нейкіх прэтэнзіяў з боку дзяржаўных органаў да гэтай канкрэтнай асобы», – распавёў генпракурор Андрэй Швед.
Палітолаг Дзмітрый Балкунец назваў стварэнне камісіі пасткаю: Лукашэнку не дае спакою справа вяртання беларусаў, бо яму вельмі хочацца «перагарнуць старонку», як ён гэта бачыць, а паралельна – спыніць адток кадраў з Беларусі ды аслабіць санкцыі. Бо гэтыя фактары пачынаюць, відаць, моцна ўплываць на пэўныя сферы эканомікі.
Якуб Хруст belsat.eu
