Галоўнае за дзень. Дзявяты суд над сужэнцамі і смерць на тэрыторыі расейскай амбасады
«Белсат» падводзіць вынікі 5 лістапада, 452-га дня супрацьстаяння беларускага народу пасля фальсіфікаваных прэзідэнцкіх выбараў і гвалту сілавікоў.
Палітзняволеных сужэнцаў дзявяты раз запар асудзілі на 15 содняў
У судзе Ленінскага раёну палітзняволеным Анастасіі Крупеніч-Кандрацьевай і яе мужу Сяргею Крупенічу ў дзявяты раз прысудзілі чарговыя содні – гэтым разам 15. Такі вырак вынесла суддзя Анастасія Ачалава па ч.2 арт. 19.11 КаАП («Распаўсюджванне экстрэмісцкіх матэрыялаў»).
Агулам Анастасія атрымала 126 содняў арышту, Сяргей – 127 содняў.
Паводле праваабаронцаў, гэтыя арышты ім прысудзілі за «экстрэмізм» у прыватнай перапісцы – спасылкі на розныя каналы, прызнаныя «экстрэмісцкімі», якія яны перасылалі адзін аднаму.
Прадстаўнікі праваабарончай супольнасці Беларусі прызналі палітвязнямі мужа і жонку пасля сёмага суда над імі.
Беларусь збіраецца выслаць гуманітарную дапамогу В’етнаму
Урад Беларусі прыняў пастанову аб парадку надання гуманітарнай дапамогі В’етнаму на суму 850 572 рублі і 50 капеек.
Дапамога складаецца з:
- 25 медычных рэнгтгенапразрыстых ложкаў з электрапрыводам;
- 25 каталак для перавозкі пацыентаў;
- 25 рэанімацыйна-хірургічных манітораў;
- 25 мабільных блокаў падачы медычных газаў;
- 25 000 медычных камбінезонаў;
- 10 партатыўных манітораў пацыентаў;
- 10 каталак «Інтэграл КЭМ»;
- 483 аднаразовых нестэрыльных камбінезонаў.
У Берліне загінуў супрацоўнік расейскай амбасады
Нямецкае выданне «Der Spiegel» паведаміла пра няшчасны выпадак на тэрыторыі расейскай амбасады ў Берліне: там выпаў з акна і памёр супрацоўнік. Цела мужчыны знайшлі пад сценамі амбасады яшчэ раніцай 19 кастрычніка. Службы экстранай дапамогі, якія прыбылі на месца здарэння, не змаглі рэанімаваць яго.
Незалежныя расейскія журналісты-расследавальнікі даведаліся асобу загінулага. Гэта 35-гадовы Кірыл Жало, сын начальніка Упраўлення па абароне канстытуцыйнага ладу ФСБ генерал-лейтэнанта Аляксея Жало. Таксама яны называюць смерць супрацоўніка забойствам, бо будынак пасольства мае чатыры паверха і версія аб суіцыдзе выглядае непраўдападобнай.
У амбасадзе ж Расеі гэты інцыдэнт назвалі «няшчасным выпадкам». Расейскае пасольства рэпатрыявала яго цела на наступны дзень.
За падпіску на «экстрэмісцкі канал» супрацоўніцу IT-кампаніі асудзілі на 15 содняў арышту
ГУБАЗіК затрымаў супрацоўніцу HR-дэпартамента кампаніі Godel Technologies Вольгу Казаду. Па месцы пражывання і рэгістрацыі дзяўчыны правялі ператрусы. Ноч яна правяла ў ІЧУ на Акрэсціна.
На Вольгу склалі пратакол за «распаўсюд экстрэмісцкіх матэрыялаў», згодна з якім яна «захоўвала ў асабістым акаўнце матэрыялы тэлеграм-каналу «Баста», які прызнаны «экстрэмісцкім». Жанчына заявіла, што «чытае тэлеграм-каналы, але не распаўсюджвае іх».
Адвакатка жанчыны нагадала «суддзі», што «падпіска на канал не прыраўноўваецца да захоўвання экстрэмісцкіх матэрыялаў». Але «суддзя» Юлія Блізнюк не стала ўлічваць гэтыя аргументы і прысудзіла Вользе Казадой 15 содняў.
Суд над маці пяцярых дзяцей Вольгай Залатар пачнецца 15 лістапада
Жанчыну будуць судзіць па двух артыкулах Крымінальнага кодэксу: ч.1 арт. 361-1 («Стварэнне экстрэмісцкага фарміравання») і ч. 1 і 2 арт. 342 («Арганізацыя і навучанне дзеянняў, якія груба парушаюць грамадскі парадак»).
Ёй пагражае да сямі гадоў пазбаўлення волі.
Лідару Партыі БНФ Рыгору Кастусёву патрэбная тэрміновая аперацыя
Яму прынамсі пачалі даваць лекі, але сітуацыя з анкалагічнаю хваробаю пагаршаецца.
У лісце да магілёўскага абласнога каардынатара руху «За свабоду» Пятра Мігурскага Кастусёў паведаміў, што з 14 кастрычніка яму пачалі даваць хоць нейкае лекаванне: па два ўколы на дзень і кучу таблетак. Кастусёву зрабілі паўторнае ультрагукавое даследаванне, якое паказала пагаршэнне сітуацыі.
АД, belsat.eu
