Сёння а 13:25 у сяле Гроза Купянскага раёну, што на Харкаўшчыне, у выніку абстрэлу прадуктовай крамы загінулі цывільныя асобы. Пракуратура Украіны спачатку паведамляе пра 49 забітых і 7 параненых. Вядзецца разбор завалаў. Паводле апошніх дадзеных колькасць ахвяраў вырасла да 51.
Паводле дадзеных кіраўніка Харкаўскай вобласці Алега Сынегубава, абстрэл пачаўся ў той момант, калі ў кавярні і ў краме было шмат цывільных асобаў. Паводле апошніх дадзеных, у кавярні, у якую трапіла ракета, праходзілі памінкі, менавіта таму там было так шмат людзей.
Паведамляецца, што сярод забітых ёсць дзіця – 6-гадовы хлопчык.
На трагедыю адрэагаваў Уладзімір Зяленскі.
«Паказальна жорсткае расейскае злачынства – удар ракеты па звычайнай прадуктовай краме, абсалютна свядомы тэракт… Расейскі тэрор трэба спыніць. Усе, хто дапамагае Расеі абыходзіць санкцыі, злачынцы. Усе, хто падтрымлівае Расею да гэтай пары, падтрымліваюць зло», – напісаў у сваім Telegram-канале прэзідэнт Украіны.
Раман Шавель belsat.eu
