Нарадзінка Украіны Караліна Сііно, якая перамагла ў конкурсе «Міс Японія», адмовілася ад кароны, піша выданне «The Japan Times». Прычынаю стаўся раман дзяўчыны з жанатым мужчынам. Гэта першы выпадак у гісторыі конкурсу, калі пераможца адмовілася ад тытула.
Скандал успыхнуў пасля публікацыяў у японскіх медыях пра стасункі Караліны Сііно з жанатым лекарам. Арганізатары конкурсу «Міс Японія» пасля правярання адсправаздачыліся, што мужчына не казаў пра сваё сямейнае становішча, і дзяўчына не ведала аб жонцы свайго бойфрэнда.
Аднак цяпер высветлілася, што Караліна ўсё-ткі ведала, што мужчына жанаты, і за хлусню яна перапрасіла, адзначае «The Japan Times». Дзяўчына адмовілася ад тытула «Міс Японія», і арганізатары падтрымалі гэтае рашэнне.
Нікому з удзельніц мінулага конкурсу карону перадаваць не будуць, такім чынам, да наступнага года «пасада» застанецца вакантнаю.
Гэты выпадак – першы ў гісторыі конкурсу «Міс Японія», калі пераможца адмовілася ад тытула.
Караліна ў 5-гадовым узросце пераехала ў Японію разам з маці. У размове з «Белсатам» дзяўчына казала, што адчувае сябе японкаю, пры гэтым не ўсе ў краіне былі згодныя з тым, што ў нацыянальным конкурсе прыгажосці бярэ ўдзел натуралізаваная грамадзянка.
Караліна тлумачыла, што ўдзелам у конкурсе хацела даказаць: галоўнае, як асобы сябе ідэнтыфікуюць, а не выглядаюць вонкава.
«Я хацела, каб людзі больш даведаліся пра мяне, што ёсць такая: выглядае як украінка, але жыве як японка, што ёсць такія людзі, і не толькі я, яшчэ багата такіх людзей. Я хацела, каб больш пра гэта ведалі ў Японіі і больш зразумелі пра нас, каб людзі пачалі глядзець углыб. Хацела спраўдзіць, ці ўспрымуць мяне як японку», – апавяла суразмоўца «Белсату».
Сцяпан Кубік belsat.eu
