У Арменіі суд першай інстанцыі арыштаваў на 40 содняў беларуса Яраслава Новікава, якому пагражае дэпартацыя на радзіму, паведамляе «Радыё Свабода». У Беларусі супраць мужчыны заведзеная крымінальная справа за ўхіленне ад абавязковай вайсковай службы, яго абвесцілі ў міждзяржаўны крымінальны вышук СНД.
Юрыст Хельсінкскай асацыяцыі ў Арменіі Араік Папікян, які абараняе беларускага грамадзяніна, быў упэўнены, што арышту не будзе, бо дакументы з Менску, на падставе якіх суд ухваліў рашэнне, не адпавядалі заканадаўству Арменіі і Еўрапейскай канвенцыі.
Цягам некалькіх дзён праўнік абскардзіць пастанову суда першай інстанцыі:
«Вядома, заўтра-паслязаўтра мы будзем падаваць апеляцыю, а пракуратура цягам 40 дзён будзе чакаць з Беларусі адпаведныя дакументы аб перадаванні. Спадзяюся, што ў апеляцыйным судзе будзе больш кваліфікаваны суддзя, і рашэнне будзе справядлівым і адпавядаць усім нормам права».
Яраслава Новікава затрымалі ў Арменіі на мяжы з Грузіяй 2 лютага. Падчас памежнага кантролю высветлілася, што Менск абвесціў яго ў міждзяржаўны крымінальны вышук СНД з увагі на крымінальную справу за ўхіленне ад абавязковай вайсковай службы.
Новікаў жыў у Грузіі, планаваў пераехаць у Балгарыю, аднак амбасада ў Тбілісі не дала візы. Беларус пастанавіў ехаць у Ерэван, каб там падаць дакументы на візу.
Сцяпан Кубік belsat.eu
