Журналістка Ірына Слаўнікава даслала ліст з-за кратаў, у якім распавядае пра побыт з суседкамі ў камеры. Журналістка піша, што мае планы на будучыню, а зняволенне ўспрымае як часовую неспадзяванку.
Ірына Слаўнікава, якую затрымалі разам з мужам Аляксандрам Лойкам у Нацыянальным аэрапорце 30 кастрычніка летась, з’яўляецца падазраванай паводле арт. 342 КК («Арганізацыя і рыхтаванне дзеянняў, якія груба парушаюць грамадскі парадак, або актыўны ўдзел у іх»).
Беларускія праваабарончыя арганізацыі прызналі журналістку палітзняволенай і патрабуюць адпусціць яе.
Ірына за кратамі не губляе аптымізму і ў лістах падтрымлівае сваіх знаёмых.
«Маю ў суседках па нумару вельмі разнастайных асобаў і па характару і па тэмпераменту. Але мы знайшлі свой баланс у зносінах, калі няма падставаў для канфліктаў. Пры тым што мы ў кантакце 24 на 7.
Нарэшце маю магчымасць шмат чытаць, калі мы сазнаемся сам насам з кнігаю. Раней пры чытанні думкі лёталі нібы спалоханыя птушкі і вочы бегалі па радках без асэнсавання напісанага.
Пастанавіла: адолець нейкі ўмоўны спіс і пайсці ўжо адсюль.
Спіс не вельмі працяглы.
Намагаюся ставіцца да ўсяго як да нейкай прыгоды. І пакуль няблага атрымліваецца.
Вы напісалі, што былі блізу кінатэатра «Мір». Эх, як я даўно не была ў кіно і ў кавярні. Але ўсё наперадзе.
Маю шмат планаў. А гэта неспадзяванка, якую трэба спакойна пражыць і толькі.
Перадавайце ўсім добрым людзям абдымкі і прывітанне! Не сумуйце там моцна і беражыце сябе! Усё будзе добра!
Абдымаю вас! З павагаю, Ірына»
Даслаць ліст журналістцы можна на адрас:
СІЗА №1, 220030, Менск, вул. Валадарскага, 2 Слаўнікава Ірына Аляксандраўна
МЛ belsat.eu