Прэм’ер-міністр Раман Галоўчанка ўхваліў пастанову аб працягненні да 1 студзеня 2024 года рэгулявання цэнаў на будаўнічыя матэрыялы. Дакумент апублікавалі на Нацыянальным прававым інтэрнэт-партале.
Цэны на будматэрыялы пачалі рэгуляваць у ліпені летась. Планавалася, што захады будуць дзейнічаць да 1 студзеня 2023 года, але ўлады пастанавілі прадоўжыць рэгуляванне яшчэ на год. Адпаведны дакумент, падпісаны прэм’ер-міністрам Раманам Галоўчанкам, апублікавалі на Нацыянальным прававым інтэрнэт-партале.
Адначасова у пастанову дадалі новыя артыкулы, цэны на якія цяпер таксама рэгулюе дзяржава, сярод іх — сеткі, матрацы, кардон ды іншыя вырабы з шкловалакна (акрамя шклотканіны).
Напярэдадні, 4 студзеня, у эфіры дзяржаўнага тэлебачання міністр архітэктуры і будаўніцтва Руслан Пархамовіч заявіў, што «скачкападобнага росту цэнаў на будматэрыялы не плануецца, будзе прадоўжана іхнае рэгуляванне».
У кастрычніку летась паведамлялася, што за год будаўнічыя матэрыялы падаражэлі на 22,5 %.
Сяргей Крот belsat.eu