3 снежня памёр шматгадовы старшыня Беларускага інстытуту навукі і мастацтва (БІНіМ), доктар Вітаўт Кіпель. Яму было 95 гадоў. Пра гэта паведамляе «Наша ніва».
Вітаўт Кіпель нарадзіўся 30 траўня 1927 года ў сям’і беларускага педагога Яўхіма і Марыі Кіпеляў. Пасля арышту бацькі ў 1933-м апынуўся ў Расеі ў высылцы, вярнуўся ў Менск толькі ў 1942-м. У 1944 годзе сям’я зноў была вымушаная ехаць у выгнанне на Захад.
У 1953 годзе скончыў Лёвэнскі ўніверсітэт (Бельгія) са спецыяльнасцю геолага, у 1955-м атрымаў ступень доктара мінералогіі. Быў намеснікам старшыні Саюзу беларусаў Бельгіі.
У 1955 годзе пераехаў у ЗША. Працаваў у навукова-вытворчых фірмах, у Балтымарскім універсітэце, Даследчым цэнтры навукі і тэхналогіі Нью-Ёркскай публічнай бібліятэкі, сабраў калекцыю беларускіх выданняў. Таксама выкладаў у беларускай школе ў Брукліне і супрацоўнічаў з радыё «Свабода».
У 1972–1982 гадах – старшыня Федэрацыі беларускіх рэспубліканскіх клубаў, браў актыўны ўдзел у жыцці Рэспубліканскай партыі ў Нью-Джэрзі. Быў абраны намеснікам старшыні Нацыянальнай канфедэрацыі амерыканскіх этнічных групаў і ўзнагароджаны медалём Паняволеных народаў Айзэнгаўэра.
У 1972 годзе на Каляды Вітаўт Кіпель сустрэўся з прэзідэнтам Рычардам Ніксанам і абмеркаваў з ім беларускае нацыянальнае пытанне, заклікаючы кіраўніка ЗША наведаць Беларусь падчас візіту ў СССР. У 1974-м Ніксан стаўся першым прэзідэнтам ЗША, які пабываў у Беларусі.
З 1982 года – старшыня БІНіМу. Аўтар шэрагу грунтоўных бібліяграфічных даведнікаў, а таксама дзясяткаў публікацый, у тым ліку артыкулаў беларусазнаўчай тэматыкі ў амерыканскіх энцыклапедыях. У 1993 годзе выйшла ягоная першая манаграфія «Беларусы ў ЗША». Разам з жонкаю Зораю Кіпель уклаў фундаментальную «Бібліяграфію беларускага і беларусаведнага друку на Захадзе». Выдаў кнігу ўспамінаў «Жыць і дзеіць» (2015). У 1997 годзе абраны ў склад Прэзідыуму Рады БНР.
Якуб Хруст belsat.eu
