Іран скасаваў падраздзяленні паліцыі маральнасці пасля больш як двух месяцаў пратэстаў, выкліканых арыштам Магсы Аміні за нібыта парушэнне строгага жаночага дрэс-коду краіны, паведамляе «Al-Arabiya» са спасылкаю на агенцтва ISNA.
«Паліцыя маральнасці не мае нічога агульнага з судоваю сістэмай» і мае быць скасаваная, заявіў генеральны пракурор Ірану Магамад Джафар Мантазэры ўвечары 3 снежня.
Між тым «The Guardian» піша таксама, што ўлады Ірану пастанавілі перагледзець закон, які патрабуе ад жанчын пакрываць галовы:
«І парламент, і судовыя органы працуюць [над пытаннем], ці патрэбныя змены ў законе», – заявіў ужо згаданы Мантазэры.
Пры гэтым невядома, што канкрэтна плануецца змяніць. Вынікі могуць быць «праз тыдзень – два».
Прэзідэнт Ірану Эбрагім Раісі заявіў 3 снежня, што рэспубліканскія ды ісламскія асновы Ірану замацаваныя ў Канстытуцыі:
«Але ёсць метады выканання Канстытуцыі, якія могуць быць гнуткімі».
Падчас пратэстаў, якія пачаліся 16 верасня, у Іране забітыя прынамсі 448 пратэстоўцаў. Паведамляюць пра дзясяткі забітых і сярод сілавікоў. Арыштаваныя прынамсі 14 тысяч пратэстоўцаў, у тым ліку дзеці. Арышты трываюць.
Якуб Хруст belsat.eu