Фігуранты «справы Аўтуховіча» заявілі аб пагрозе іхным жыццям і здароўю і перадалі спіс адказных за гэта сілавікоў
На волю вязні змаглі перадаць зварот, дзе пайменна назвалі сілавікоў, адказных за пагрозы іхнаму жыццю і здароўю. Вядома, што зварот падпісалі Уладзімір Гундар, Галіна Дзербыш, Вольга Маёрава і Ірына Мельхер, паведамляе тэлеграм-канал «Позірк».
«Мы заяўляем аб рэзкім узмацненні фізічнага і псіхалагічнага ціску на большасць абвінавачаных у крымінальнай справе № 20125030489 («справа групы Аўтуховіча»). Відавочны поўны развал абвінавачання, і сістэме не застаецца нічога іншага, як узмацніць рэпрэсіі», – гаворыцца ў звароце.
Вось спіс сілавікоў, якіх яны лічаць вінаватымі:
- палкоўнік КДБ Варанецкі;
- следчыя Церашонак, Галавач, Лаўранчук, Герасімовіч;
- суддзя Філатаў;
- пракуроры Рабаў, Герасіменка.
- начальнік турмы Казакоў, намеснік начальніка Станеўскі, начальнік рэжымнага аддзелу Коршунаў.
Абвінавачаныя, якія падпісалі зварот, выказалі спадзяванне, што ў новай свабоднай Беларусі ўчынкі пералічаных сілавікоў «будуць ацэненыя паводле заслугаў народам і правасуддзем».
На пачатку жніўня Беларускі Хельсінкскі камітэт накіраваў спецдакладчыкам ААН паведамленне пра катаванне абвінавачаных у «справе Аўтуховіча». Паводле звестак праваабаронцаў, абвінавачаных трымаюць у негуманных умовах, ужываюць псіхалагічныя і фізічныя катаванні, пазбаўляюць магчымасці весці ліставанне і не надаюць неабходнай медычнай дапамогі.
Алена Рувіна belsat.eu
