Міністэрства абароны Беларусі паведаміла, што ў Расею «дзеля практычнай падрыхтоўкі» выправіліся разлікі ракетнага комплексу «Іскандэр-М». «Асабоваму складу трэба будзе дэталёва вывучыць ужыванне тактычных ядравых боепрыпасаў», – заявілі ў прэс-службе ведамства.
Беларускія вайскоўцы будуць навучацца на расейскім палігоне – на якім менавіта, не ўдакладняецца.
«Асноўнымі пытаннямі поўнага цыклу навучання стануць далейшае ўдасканаленне практычных навыкаў у падрыхтоўцы ракетнага комплексу да ўжывання, трэнаванні ў яго разгортванні, а таксама правядзенне вучэбна-баявых пускаў», – паінфармавала прэс-служба Міністэрства абароны Беларусі.
Таксама асабовы склад навучаць прымяняць тактычныя ядравыя боепрыпасы комплексу.
Пры гэтым у студзені Мінабароны паведамляла, што беларускія вайскоўцы пачалі «поўную самастойную эксплуатацыю» аператыўна-тактычнага ракетнага комплексу «Іскандэр» пасля навучання ў Расеі.
Тым часам міністр абароны Расеі Сяргей Шайгу сёння паведаміў, што Беларусь атрымала комплекс «Іскандэр», які можа выкарыстоўваць як звычайныя, гэтак і ядравыя ракеты. Ён пацвердзіў, што 3 красавіка беларускія вайскоўцы пачалі трэнаванне на расейскім палігоне.
Пра тое, што «Іскандэры» пастаўленыя на баявое дзяжурства ў Беларусі, Аляксандр Лукашэнка абвесціў летась у снежні. Яшчэ да вайны ва Украіне ён казаў, што хоча размясціць іх на заходнім і паўднёвым кірунках.
Сяргей Крот belsat.eu