Прэзідэнт Польшчы Анджэй Дуда адрэагаваў на падзеі ва ўкраінскай Бучы. Ён заклікаў накіраваць ва Украіну яшчэ больш зброі.
«Злачынцы мусяць быць названыя злачынцамі, прыцягнутыя да адказнасці і асуджаныя. Фатаграфіі з Бучы абвяргаюць думку, што мы павінны шукаць кампраміс любой цаной. Насамрэч абаронцам Украіны патрэбныя тры рэчы: зброя, зброя і яшчэ раз зброя», – напісаў Дуда.
У сваю чаргу прэм’ер-міністр Польшчы Матэўш Маравецкі лічыць неабходным неадкладна склікаць саміт Еўразвязу аб ваенных злачынствах Расеі ва Украіне і ўвесці новыя санкцый супраць Масквы.
«Бучанская бойня – гэта больш чым трывожны званок для Еўропы і свету. Гэта страшны крык аб справядлівасці, свабодзе і праве на жыццё. Аб асноўных і агульначалавечых каштоўнасцях. ЕЗ павінен канфіскаваць усе расейскія актывы ў заходніх банках, а таксама актывы расейскіх алігархаў. ЕЗ павінен неадкладна разарваць усе гандлёвыя адносіны з Расеяй. Еўрапейскія грошы мусяць перастаць паступаць у Крэмль», – напісаў у Facebook Маравецкі.
Прэм’ер-міністр Польшчы таксама перакананы, што Украіне трэба даць больш зброі для абароны.
Аб злачынствах расейскіх вайскоўцаў, якія сышлі з Кіеўскай вобласці, выказаліся прэзідэнт Францыі Эманюэль Макрон, генеральны сакратар NATO Енс Стольтэнбэрг, старшыня Еўракамісіі Урзуля фон дэр Ляен, дзяржаўны сакратар ЗША Энтані Блінкен ды іншыя.
АД belsat.eu