Пайшоў з жыцця беларускі архітэктар Вальмэн Аладаў. Ён творца ўніверсаму «Центральный» і Камароўскага рынку
Заслужаны архітэктар БССР Вальмэн Аладаў памёр ва ўзросце 91 год. Калегі паведамляюць, што нядаўняя смерць жонкі падкасіла яго стан, паведамляе Беларускі звяз архітэктараў.
Аладаў з’яўляецца аўтарам больш за 100 будынкаў, збудаванняў і архітэктурных ансамбляў.
Ён нарадзіўся ў Менску, скончыў Маскоўскі архітэктурны інстытут, пасля працаваў архітэктарам і выкладаў. Ягоныя бацькі знакамітыя дзеячы культуры Беларусі. Бацька быў вядомым кампазітарам, маці – мастацтвазнаўцам і больш за 30 гадоў узначальвала Нацыянальны мастацкі музей БССР.
Самыя вядомыя яго работы – спартыўны комплекс «Раўбічы», Камароўскі рынак, універсамы «Фрунзенский», «Серебрянка», «Центральный», ансамбль жылых дамоў на рагу пр. Незалежнасці і вул. Казлова з крамай «Океан» у Менску, шэраг іншых жылых дамоў.
Таксама ён праектаваў майстэрню-музей скульптара Заіра Азгура, будынак Прэзідыума Акадэміі аграрных навук БССР у Менску; сталовыя на 1000 пасадачных месцаў заводу «Гарызонт» і 15-га корпуса БНТУ.
У 1965 годзе па ініцыятыве Вальмэна Аладава быў створаны дзяржаўны інстытут праектавання прадпрыемстваў гандлю і грамадскага харчавання «Белгіпраторг», які сам і ўзначаліў. Па распрацаванай ім методыцы ў Беларусі і многіх гарадах былога Савецкага Саюзу пабудаваны некалькі тысяч сталовых новага тыпу на прамысловых прадпрыемствах і ў навучальных установах з так званай лініяй раздачы ежы.
АД, belsat.eu
