Паводле праваабарончага цэнтру «Вясна», цягам жніўня ў беларускіх судах разглядаліся 162 адміністратыўныя справы. З іх 114 – за распаўсюд экстрэмісцкіх матэрыялаў.
Таксама праваабаронцам вядома пра 43 арышты, 33 штрафы за адзін месяц. У фігурантаў справаў забралі не менш за 33 тэлефоны ў якасці «прадмета адміністратыўнага правапарушэння».
Беларусаў судзілі за чахлы на тэлефонах з Пагоняй на бел-чырвона-белым фоне, пашпарты з бел-чырвона-белай налепкай, антываенныя лозунгі, бел-чырвона-белыя вымпелы на шыбе аўтамабіля, жоўта-блакітныя налепкі на матацыкле, выкананне песні гурта «Океан Ельзи» «Обійми».
У жніўні ў беларускіх гарадах прайшоў шэраг «рэйдаў» сілавікоў, падчас якіх мясцовых жыхароў затрымлівалі за падпіскі на «экстрэмісцкія каналы». Вядома, што толькі ў Баранавічах цягам апошняга летняга месяца за распаўсюд экстрэмісцкіх матэрыялаў паводле арт. 19.11 КаАП РБ судзілі 12 чалавек. Ператрусы, затрыманні і палітычна матываваныя суды сёлета ў жніўні адбываліся амаль штодня, кажуць праваабаронцы.
Хваля рэпрэсіяў прайшла ў жніўні ў Пінску. Затрымалі і асудзілі за распаўсюд экстрэмісцкіх матэрыялаў, непадпарадкаванне міліцыянтам, несанкцыянаванае пікетаванне не менш за 14 чалавек. З іх 11 асобаў кінулі за краты, а траіх аштрафавалі.
Марыя Міхалевіч belsat.eu
