EPAM прадаў сваю расейскую юрыдычную асобу «EPAM Systems» расейскай кампаніі «Группа Рексофт», піша «Интерфакс» са спасылкаю на звесткі адзінага дзяржаўнага рэестру юрыдычных асобаў. Угода адбылася 2 жніўня.
Сумы ўгоды не называюць. Пакупнік для расейскіх актываў EPAM знайшоўся яшчэ ў канцы 2022 года. Але ўвесь гэты час угоду адкладалі з прычынаў, якіх не тлумачылі публічна. У траўні кампанія паведаміла, што атрымала дазвол ад расейскіх уладаў на ўгоду.
Кампанія «EPAM Systems» была зарэгістраваная ў 2001 годзе. У 2022-м скараціла выручку на 47,6 % – да Br 15 мільярдаў. Кампанія атрымала чыстую страту Br 3 мільярды супраць прыбытку Br 5,5 мільярдаў у 2021 годзе.
«Группа Рексофт» – адзін з асноўных расейскіх распрацоўнікаў лічбавых развязанняў для банкаўскай, фінансавай галінаў, дзяржаўнага сектару, рытэйлу, транспарту, лагістыкі, медыяў, гатэльнага бізнесу. Паводле звестак на жнівень 2022 года, 20 % кампаніі «Группа Рексофт» належыць структуры «Интерроса» расейскага алігарха Уладзіміра Патаніна. «Интеррос» набыў долю ў «Рексофте» ў красавіку 2022-га. Патанін казаў, што гэтая ўгода мае стратэгічную важнасць на фоне сыходу з расейскага рынку заходніх кампаніяў, як EPAM, «Accenture», SAP.
EPAM паведаміў пра намер пакінуць Расею ў 2022 годзе. Тады ж спынілі абслугоўванне мясцовых кліентаў. У верасні 2022-га кампанія заявіла, што падпісала пагадненне аб продажы практычна ўсіх сваіх расейскіх актываў.
Марыя Міхалевіч belsat.eu