Федэральная служба бяспекі Расеі паведамляе пра затрыманне расейскага грамадзяніна, які нібыта рыхтаваў замах на кіраўніка Крыму Сяргея Аксёнава. Затрыманы даў прызнальныя паказанні.
ФСБ Расеі 3 ліпеня паведаміла пра перадухіленне замаху на кіраўніка Крыму Сяргея Аксёнава. Затрымалі выканаўцу меркаванага замаху, ён даў прызнальныя паказанні: кажа, што быў завербаваны Службаю бяспекі Украіны.
«Затрыманы грамадзянін Расеі, 1988 года нараджэння, які быў завербаваны супрацоўнікамі СБУ і прайшоў на тэрыторыі Украіны курс навучання выведна-падрыўной дзейнасці, у тым ліку – навучанне мінна-выбухной справе», – гаворыцца ў паведамленні.
ФСБ сцвярджае, што мужчына планаваў падарваць машыну Аксёнава, але яго злавілі, калі забіраў бомбу са схованкі. Пачалі крымінальную справу паводле артыкулаў аб замаху на тэракт і незаконным набыцці выбухоўкі. Затрыманага ўзялі пад варту.
Паводле расейскага прапагандысцкага агенцтва «РИА Новости», затрыманы па абвінавачанні ў замаху на Аксёнава расейскі грамадзянін прызнаўся, што нібыта ў чэрвені прыбыў у Крым і прыступіў да рыхтавання тэракту. Агенцтва прыводзіць ягоныя словы, распаўсюджаныя ФСБ.
«У снежні 2022 года быў завербаваны спецслужбамі Украіны, куратарам Ігарам, атрымаў пазыўны Каратыст і праходзіў навучанне на палігоне падрыўной справе, маскаванню і нанясенню грыму, адыходу ад пераследу і таму падобнаму. Затым я атрымаў заданне паехаць у Крым, у Сімферопаль. Для пачатку мне трэба было зняць жытло, купіць тэлефон, уладкавацца на працу. Я выходзіў кожны дзень на сувязь з Ігарам, чакаў далейшых указанняў. Чакаў адрас, дзе стаіць аўтамабіль, каб устанавіць міну, каб потым паставіць гэты аўтамабіль на вуліцу Севастопальскую для падрыву картэжу Сяргея Аксёнава», – прыводзіць «РИА Новости» словы затрыманага.
Украінскі бок пакуль што гэтую інфармацыю не каментуе.
Антон Тачняк belsat.eu