Былая палітзняволеная распавяла, як маецца нашая калега, журналістка «Белсату», Кацярына Андрэева. Ейныя словы перадае праект пра гісторыі палітзняволеных беларусак «Палітвязынка».
«Каці з самага пачатку вельмі цяжка было. Яе размеркавалі ў прэс-атрад, праз які прайшлі шмат якія палітзняволеныя дзяўчаты. Цяпер там Соф’я Сапега, і яе вельмі жорстка прэсуюць ужо працяглы час. Яе і Паліну Шарэнду-Панасюк выклікалі на «гутарку» да начальніка калоніі.
Каця вельмі чулая. І на яе аказваецца маральны ціск з боку маргінальных асобаў. Каці забаранялі нават падыходзіць да палітычных. А калі ўдавалася ёй перакінуцца з намі словамі, было відаць, што яна стараецца з усіх сіл усё гэта выносіць. Каця цяпер вярнулася ў калонію з дадатковым тэрмінам. Яе перавялі ў лепшы атрад, але на фабрыцы ёй забаранілі нават глядзець на палітычных. Каця моцна напакутавалася, але вельмі годна праходзіць гэты шлях, як бы цяжка ёй ні было», – перадае былая палітзняволеная.
Журналістку «Белсату» Кацярыну Андрэеву затрымалі 15 лістапада 2020 года падчас стрыму з плошчы Пераменаў. Разам з журналісткаю Дар’яй Чульцовай яе асудзілі да 2 гадоў пазбаўлення волі. Сёлета Кацярыне выставілі новае абвінавачанне – у «здрадзе дзяржаве». 13 ліпеня Гомельскі абласны суд даў ёй 8 гадоў і 3 месяцы калоніі агульнага рэжыму паводле сфабрыкаванага абвінавачання.
Суд праходзіў у закрытым рэжыме. На падставе якіх падзеяў паўстала гэтая справа, дасюль не вядома. У судзе заявілі, што Кацярыну прызналі вінаватай «у выдачы дзяржаўных сакрэтаў замежнай арганізацыі, замежнай дзяржаве».
Падтрымаць палітзняволеную журналістку можна паштоўкаю ці лістом на адрас: ПК № 4. 246035, г. Гомель, вул. Антошкіна, 3, Кацярына Андрэеўна Бахвалава.
Алена Рувіна belsat.eu