Рымска-каталіцкаму семінарысту Уладзіславу Беладзеду дадалі яшчэ 15 содняў адміністратыўнага арышту. Пра гэта паведамляе тэлеграм-канал «Хрысціянская візія». Агулам ён правядзе за кратамі 45 содняў, але гэта не значыць, што Уладзіслаў выйдзе на волю, бо пасля яго зноў могуць перазатрымаць.
Уладзіслава Беладзеда затрымалі яшчэ 31 траўня і ўжо двойчы арыштоўвалі на 15 содняў. Першы арышт яму прызначылі за перасыланне аднаго з казанняў Патрыярха Кірыла. Апошні суд быў паводле артыкулу «Распаўсюд экстрэмісцкіх матэрыялаў» (арт. 19.11 КаАП).
Тэлеграм-канал «Хрысціянская візія» адзначае, што пасля 30 содняў на Акрэсціна Уладзіслаў выглядае, як чалавек, які зазнаваў катаванні і бесчалавечнае абыходжанне, але ён захоўвае маральныя сілы. Родныя на судзе звярнулі ўвагу на сляды збівання. Таксама пасля затрымання верніка прымусілі запісаць «пакаяннае» відэа.
Уладзіслаў Беладзед – выпускнік Інстытуту тэалогіі БДУ. Пасля гэтага ён паступіў у рымска-каталіцкую семінарыю, праходзіў практыку ў менскай архікатэдры. Беладзед у 2020 годзе браў удзел у супольных малітвах пра спыненне гвалту і беззаконня.
Алена Рувіна belsat.eu
