2 чэрвеня ў Беларусі завяршаецца 298-ы дзень няспынных штодзённых пратэстаў беларусаў супраць фальсіфікацыі прэзідэнцкіх выбараў і гвалту сілавікоў.
Адной з галоўных навінаў дня стала з’яўленне інфармацыі пра вызваленне трох вязняў – актывістаў польскай дыяспары ў Беларусі, якіх за ўшанаванне памяці антыгітлераўскай «Арміі Краёвай» вінавацілі ў распальванні міжнацыянальнай варожасці. Ірэну Бярнацкую, Марыну Цішкоўскую і Ганну Панішаву вывезлі з СІЗА ў Польшчу яшчэ на мінулым тыдні, але стала вядома пра гэта толькі сёння.
Жанчыны, якія казалі пра фізічныя і псіхалагічныя катаванні, паведамілі, што да апошняга не ведалі, куды іх вязуць.
Але вызваляючы адных палітвязняў, дзейныя ўлады працягваюць набіраць новых. Гэтак, суд у Горадні сёння вынес прысуд удзельнікам перадвыбарчага пікету Святланы Ціханоўскай, якіх затрымалі год таму разам з ейным мужам Сяргеем. Дзмітрыя Фурманава пакаралі двума гадамі калоніі агульнага рэжыму, Яўгена Разнічэнку – трыма з паловаю, Уладзіміра Кнігу – чатырма гадамі.
Пачынаюцца новыя суды над жыхарамі Берасця ды Рэчыцы. Прызнаныя новыя масавыя рэпрэсіі ў Жабінцы, выносяцца новыя прысуды паводле адміністратыўных справаў.
А сумнавядомая памочніца пракурора Аліна Касьянчык нават спрычынілася да крымінальнай справы супраць уладальніцы кватэры, якую яна здымала.
Паколькі рэпрэсіі ў Беларусі не сціхаюць, апазіцыя заклікае Захад да ўзмацнення санкцыяў супраць рэжыму Лукашэнкі. Святлана Ціханоўская заяўляе, што працягне дамагацца яго прызнання злачынным.
А Павел Латушка, каб паскорыць увядзенне санкцыяў дзеля вызвалення палітвязняў, заклікаў прадстаўнікоў беларускай дыяспары прыязджаць 5 чэрвеня да беларуска-польскай мяжы, каб мітынгаваць там, а ў выпадку чаго і заблакаваць дарогу цяжкавікам на Беларусь.
Пагражаюць санкцыямі і самыя замежныя краіны. Гэтак, МЗС Украіны папярэдзіў Лукашэнку пра немінучы адказ у выпадку ягоных спробаў прызнання анексіі Крыму Расеяй ды легітымацыі «ЛНР» і «ДНР».
Расея ж між тым пералічыла менскім уладам 500 млн долараў з абяцанага летась крэдыту і працягвае не пускаць у сваё паветра еўрапейскія самалёты, якія абмінаюць Беларусь. У адказ Нямеччына ўжо заблакавала для яе сваю паветраную прастору.
А беларусы, нягледзячы ні на што, зноў і зноў працягваюць выходзіць на акцыі пратэсту і салідарнасці.
МГ belsat.eu