Нацыянальны цэнтр сейсмічнага маніторынгу Грузіі паведаміў пра землятрус магнітудай 5,3, які здарыўся недалёка ад вёскі Ірганчай у Дманіскім муніцыпалітэце (мхарэ Квэма-Картлі).
Паводле сейсмалагічнай службы, штуршкі былі зафіксаваныя 1 траўня ў 23:35 мясцовага часу.
Паведамляецца, што штуршкі адчуваліся і ў Тбілісі – прыкладна за 80 км ад эпіцэнтру, а таксама ў іншых гарадах Грузіі. Аб ахвярах і разбурэннях, звязаных з землятрусам, не паведамляецца.
Тэрыторыя на мяжы паміж Дманісі і Нінацмінда (мхарэ (край) Квэма-Картлі і Самцхэ-Джавахэці) апошнім часам сталася актыўнай сейсмічнай зонай. Падземныя штуршкі там адбываюцца штодзень.
Наймацнейшы землятрус у гэтым рэгіёне быў зафіксаваны ўвечары 13 лютага. Яго магнітуда склала 6,2. Тады ў выніку землятрусу ў Дманіскім муніцыпалітэце быў пашкоджаны будынак школы і каля 20 дамоў.
ЗК belsat.eu