Украінская выведка заяўляе, што ў Беларусь даставілі ядравыя боегалоўкі. Але ёсць нюанс
Начальнік галоўнага ўпраўлення выведкі Міністэрства абароны Украіны Кірыл Буданаў у эфіры тэлеканалу «1+1» заявіў, што ў Беларусь з Расеі ўжо даставілі першыя ядравыя боегалоўкі.
«Літаральна некалькі дзён таму першыя боегалоўкі былі дастаўленыя. Да гэтага ладзіліся маштабныя трэнаванні з ядравымі імітатарамі. Я чытаў арыгіналы дакументаў па выніках трэнаванняў. Даволі непрыгожыя для Беларусі дакументы», – заявіў кіраўнік ГУР.
Паводле яго, расейскае 12-е галоўнае ўпраўленне, адказнае за ядравую зброю, напісала, што «па выніках трэнаванняў з ядравымі імітатарамі для сістэмы «Іскандэр», якія ў невялікай колькасці ёсць у Беларусі, была прызнаная поўная негатовасць Беларусі да эксплуатацыі падобнага ўзбраення».
Аднак беларускія войскі паказалі «максімальна высокі» вынік у валоданні тэхнікай тыпу «Кропка У».
Агулам Буданаў не лічыць сур’ёзнай пагрозу ўжывання ядравай зброі Расеяй з тэрыторыі Беларусі. Ён лічыць, што гэта толькі «вялікая геапалітычная гульня» з мэтай ядравага стрымлівання і павышэння ставак.
Нагадаем, што 25 сакавіка прэзідэнт Расеі Уладзімір Пуцін абвесціў, што дамовіўся з Аляксандрам Лукашэнкам пра размяшчэнне і захоўванне на тэрыторыі Беларусі тактычнай ядравай зброі. 6 ліпеня Лукашэнка заявіў, што ядравыя боегалоўкі ўжо перамешчаныя ў Беларусь.
Лукашэнка неаднаразова заяўляў, што будзе кантраляваць тактычную ядравую зброю, якую Расея паставіць у Беларусь. І гэтак жа неаднаразова гэтыя слова зняпраўджвалі расейскія афіцыйныя асобы.
Якуб Хруст belsat.eu
