1 верасня беларускія памежнікі зафіксавалі парушэнне паветранай прасторы з боку Польшчы ў Бераставіцкім раёне Гарадзенскай вобласці.
Пра гэта паведамляе Памежны камітэт Беларусі ў сваім тэлеграм-канале.
«Польскі вайсковы верталёт Мі-24 на гранічна малой вышыні мінуў дзяржаўную мяжу, заляцеў да 1200 метраў углыб тэрыторыі Беларусі, а пасля вярнуўся назад», – гаворыцца ў паведамленні.
Адзначаюць, што беларускія памежнікі паінфармавалі польскі бок пра інцыдэнт.
У МЗС Беларусі выклікалі часовага паверанага ў справах Польшчы, ад якога запатрабавалі тлумачэнняў і расследавання інцыдэнту, пра што павінна быць паведамлена ў прымальныя тэрміны.
Нагадаем, што 1 жніўня два беларускія верталёты парушылі паветраную мяжу з Польшчаю. Міністэрства нацыянальнай абароны Польшчы выказала рашучы пратэст у сувязі з інцыдэнтам, выклікаўшы часовага паверанага ў справах Беларусі.
Раман Шавель belsat.eu