1 жніўня Аляксандр Лукашэнка пры наведванні Камянецкага раёну Берасцейскай вобласці паміж размовамі пра збор ураджаю зноў выказаўся па некаторых ключавых вайсковых і палітычных пытаннях. Сярод іх пра байцоў ПВК Вагнэра, Беларускую АЭС, карту паляка і іншыя.
Аляксандр Лукашэнка адзначыў, што Беларусь трапіла ў вялікі «міжнародны замес»: «Уся Еўропа. Амерыканцы разбураюць Еўропу. Вялікая Брытанія – гэта іхнае апірышча. З іншага боку – Польшча. Польшча нам яшчэ падкіне праблем. Не палякі, яны разумныя людзі. Але з глузду з’ехалі кіраўнікі. Амерыканцы будуць рабіць стаўку на іх», – прыводзіць словы Аляксандра Лукашэнкі БЕЛТА.
Таксама Лукашэнка адзначыў, што Еўропа для Злучаных Штатаў Амерыкі не вораг, але моцны супернік.
Аляксандр Лукашэнка аспрэчыў той факт, што 100 вагнэраўцаў перамясцілася да межаў Польшчы. «А калі і перамяшчаліся, – тут жа пачаў супярэчыць сам сабе беларускі кіраўнік, – то толькі для таго, каб перадаць баявы вопыт брыгадам, якія засяроджаны ў Берасці і Горадні».
Таксама Аляксандр Лукашэнка адзначыў, што вагнэраўцы перадаюць свой вопыт беларускім вайскоўцам і называюць іх «вельмі падрыхтаванымі». Ён дадаў, што хацеў бы захаваць падраздзяленне (вагнэраўцаў): «Гэта сапраўдныя байцы, якія прайшлі праз вайну, якія згубілі шмат сваіх сяброў. Яны абсалютна бясплатна (хаця і найміты, за грошы ўсюды і ваявалі, і працавалі) дапамагаюць нам, перадаюць вопыт».
«Гэта была мая ініцыятыва, і я не шкадую. Я хачу пакінуць гэтых хлапцоў ва Узброеных сілах нашай краіны. І, адштурхоўваючыся ад іх, больш актыўна ствараць кантрактную армію», – заявіў пра свае планы Аляксандр Лукашэнка. «Там умудроныя вопытам людзі, там у асноўным афіцэры, гэта прафесія іхная – ваяваць або абараняць краіну. Кажуць, гэта [кантрактная армія – Заўв. «Белсату»] і танней», – падкрэсліў ён.
Аляксандр Лукашэнка сказаў, што стрымлівае і забяспечвае вагнэраўцаў, якіх не адна тысяча на тэрыторыі Беларусі. Дакладную колькасць ён не стаў называць, адзначыўшы, што пад кантролем групоўкі больш за 30 тысячаў байцоў, у адваротным выпадку «яны без нас бы прасачыліся туды [у Жэшаў і Варшаву. – Заўв. «Белсату»], што мала б не падалося. Таму мяне папракаць не трэба, а няхай скажуць дзякуй», – адзначыў беларускі кіраўнік.
Пры гэтым Аляксандр Лукашэнка падкрэсліў, што ваяваць не хоча: «Я не хачу, каб гінулі нашы хлопцы. Таму трэба іх вучыць. Вось яны [вагнэраўцы] і перадаюць свой досвед. Параяць, нешта скажуць».
Расказваючы пра тактычную ядравую зброю, Аляксандр Лукашэнка адзначыў, што спадзяецца, што прымяняць яе не прыйдзецца: «Не дай бог прыйдзецца выкарыстоўваць гэтую зброю. Я ўсё-такі спадзяюся, што гэтага не будзе. Але ўсе павінны разумець, што вы да нас не лезьце… Мы дэмаркіравалі межы нашыя, мы дамовіліся з палякамі, літоўцамі, латышамі. Мы ні да каго ў агарод не лезем, але і да нас, калі ласка, не лезьце. Мы забяспечым сябе і сваю бяспеку з улікам дапамогі нашых сяброў».
Такім сябрам Аляксандр Лукашэнка назваў Расею: «Павінны сказаць, я сёння не магу прад’явіць нейкія прэтэнзіі ці пакрыўдзіцца на Расейскую Федэрацыю, на прэзідэнта Расеі, што яны не адрэагавалі на мае просьбы, нават на самыя сур’ёзныя. Я маю на ўвазе ядравую зброю».
Адначасова з гэтым Аляксандр Лукашэнка падкрэсліў, што ядравая зброя – «гэта бяспека»:
«На ядравую краіну яшчэ ніколі ніхто не нападаў. У нас атамная станцыя. Гэта, я вам мушу сказаць, вельмі моцны фактар бяспекі. Калі рване не дай бог, то мала не падасца і там [маецца на ўвазе на Захадзе – Заўв. «Белсату»] у тым ліку. З гэтай справай трэба быць вельмі асцярожным».
Таксама Аляксандр Лукашэнка выказаўся наконт людзей, уладальнікаў картаў паляка: «Мы ж з вамі сербанулі гэтага дабра ў свой час. Толькі ў гэтым праблема. І ў гэтым плане мы яшчэ практычна нікога не пазбавілі грамадзянства». Ён падкрэсліў, што гаворка пра нейкія меры можа весціся толькі ў дачыненні да «ворагаў», якія змагаюцца «супраць нашай краіны» і заклікаюць да санкцыяў.
Ён адзначыў, «што датычна карты паляка, ну мы даволі моцна падрэзалі крылы гэтым людзям. Адчуваю, што гэтая тэма ёсць. Мы яшчэ раз вернемся да гэтай праблемы» і даручыў сваёй адміністрацыі прапрацаваць гэтае пытанне і вызначыць наступныя крокі.
Раман Шавель belsat.eu