Дырэктар Сі-Ай-Эй пабываў з сакрэтным візітам ва Украіне і абмеркаваў планы завяршэння вайны
Дырэктар Сі-Ай-Эй Ўільям Бэрнз наведаў з сакрэтным візітам Кіеў, дзе яму расказалі пра планы завяршэння вайны – якія тэрыторыі і калі Украіна хоча вярнуць, каб падштурхнуць Маскву да перамоваў да канца года. Пра гэта паведамляе «The Washington Post».
Падчас паездкі, пра якую раней не паведамлялася, дырэктар Сі-Ай-Эй Ўільям Бэрнз сустракаўся з прэзідэнтам Украіны Уладзімірам Зяленскім і найвышэйшым кіраўніцтвам выведкі Украіны. Візіт прыйшоўся на крытычны момант канфлікту, калі ўкраінскія сілы з усіх сілаў спрабуюць атрымаць хуткую перавагу ў сваім контрнаступе, але яшчэ не разгарнулі большай часткі сваіх штурмавых брыгадаў, навучаных і абсталяваных Захадам.
«Дырэктар Бэрнз нядаўна ездзіў ва Украіну, як ён рабіў гэта рэгулярна з пачатку нядаўняй расейскай агрэсіі больш за год таму», – прыводзіць «The Washington Post» словы афіцыйнага прадстаўніка ЗША на ўмовах ананімнасці.
Адной з мэтаў візіту быў намер пацвердзіць прыхільнасць адміністрацыі Джо Байдэна абмену выведніцкімі дадзенымі, прызначанымі дапамагчы Украіне абараніць сябе.
Выданне паведамляе, што публічна ўкраінскія афіцыйныя асобы выказалі расчараванне ў сувязі з крытыкай тэмпаў контрнаступу. Але ў прыватным парадку Кіеў прадэманстраваў Бэрнзу і «аптымістычную ўпэўненасць» у намеры вярнуць сабе значную тэрыторыю да восені. Украінскія вайскоўцы збіраюцца перамясціць артылерыйскія і ракетныя комплексы да мяжы кантраляванага Расеяй Крыму і плануюць прасунуцца далей на ўсход Украіны, каб затым прыступіць да перамоваў з Масквой.
«Расея пойдзе на перамовы толькі ў тым выпадку, калі адчуе пагрозу», – прыводзіць «The Washington Post» словы высокапастаўленага ўкраінскага чыноўніка.
Паводле звестак выдання, Зяленскі і ягоныя военачальнікі сутыкнуліся з глыбока ўмацаванымі расейскімі войскамі ў акупаваных частках усходу і поўдня Украіны і трываюць надзвычайны ціск з боку заходніх краінаў, якія перад контрнаступам далі Кіеву сучаснае ўзбраенне і рыхтаванне на мільярды долараў.
Зяленскі прызнаў, што контрнаступ ідзе «павальней, чым хацелася б», а афіцыйныя асобы пацвердзілі знішчэнне некалькіх дадзеных Захадам танкаў «Leopard 2» і баявых машынаў «Bradley». Аднак міністр абароны Украіны Аляксей Рэзнікаў заявіў, што «галоўная падзея» яшчэ наперадзе, а галоўнакамандуючы Збройнымі сіламі краіны генерал Валерый Залужны заклікаў да цярпення і заявіў, што наступленне вядзецца настолькі старанна, наколькі гэта магчыма.
Ідэальны сцэнар, ухвалены Кіевам, выглядае так: Збройныя сілы Украіны атрымаюць рычагі ўздзеяння на Расею, калі перамесцяць войскі і магутнае ўзбраенне на мяжу Украіны з Крымам ды возьмуць у закладнікі паўвостраў, дзе базуецца расейскі Чарнаморскі флот.
Аналітыкі адзначаюць, што калі Украіна атрымае магчымасць нацэліцца на дадатковыя важныя аэрадромы, масты, чыгуначныя каляіны і лагістычныя вузлы, гэта можа ўскладніць для Расеі вядзенне вайны.
Паводле звестак выдання, Кіеў мае намер скарыстаць у перамовах «фактар Крыму» – згоду не захопліваць паўвостраў сілай наўзамен на прыняцце Расеяй любых гарантыяў бяспекі, якія Украіна можа атрымаць ад Захаду.
Антон Тачняк belsat.eu
