У Гомлі за арганізацыю свята «Дзень дзён нараджэння» 27 чэрвеня 7 содняў адміністратыўнага арышту прызначылі валанцёрцы Але Караленцы, паведамляе тэлеграм-канал партыі БСДП.
Імпрэзу зарганізавалі для дзяцей украінскіх уцекачоў ад вайны. Але ўдзельнікаў, якія сабраліся ў парку палацу Румянцавых і Паскевічаў, разагнала міліцыя.
Праз некалькі дзён, 29 чэрвеня, па адну з арганізатарак – Алу Караленку – прыйшла міліцыя. Пазней стала вядома, што яна ў ІЧУ.
Пасля праўладныя тэлеграм-каналы выказаліся, што міліцыя ўмяшалася ў свята, бо баялася «правакацыяў і палітычных лозунгаў», а на масавую акцыю яго ўдзельнікі не падалі заяўкі ў гарвыканкам.
Ала Караленка – сябра партыі БСДП, у студзені мінулага года яна адбыла 7 содняў адміністратыўнага арышту за арганізацыю навагодняга свята ў лесе, а затым 15 содняў правяла за фота з афіцыйным сцягам БСДП на фоне гарадской ялінкі ў Гомлі.
Алена Рувіна belsat.eu