Цягам красавіка бягучага году праваабаронцы прызналі палітвязнямі 39 асобаў. Цягам месяцу суды ў Беларусі вынеслі не менш за 98 абвінаваўчых прысудаў паводле крымінальных справаў за пратэсты, паведамляе праваабарончы цэнтр «Вясна».
На 1 траўня праваабаронцам вядомыя больш за тысячу фігурантаў крымінальных справаў, якіх пераследуюць паводле палітычных матываў. За кратамі 360 палітвязняў, 196-ці агучылі прысуды, а ў адносінах да 28 палітвязняў працягваюцца судовы паседжанні.
Пры гэтым толькі за красавік бягучага году праваабаронцы прызналі палітвязнямі 39 асобаў. Суды за гэты месяц вынеслі 98 абвінаваўчых прысудаў за пратэсты.
5 сакавіка Іван Наскевіч, які ўзначальваў на той момант Следчы камітэт, паведаміў, што ў Беларусі з 9 жніўня 2020 года следчыя завялі 2407 крымінальных справаў экстрэмісцкай скіраванасці. У гэту колькасць уключаны ўсе «палітычныя» справы – ад надпісаў на будынках да ўжывання гвалту ў дачыненні да праваахоўнікаў.
15 красавіка Генпракуратура паведаміла, што ў краіне цяпер больш за 3 тысячы «пратэсных» крымінальных справаў. У гэты спіс уваходзяць злачынствы, звязаныя з арганізацыяй і правядзеннем незаконных масавых мерапрыемстваў і акцыяў пратэсту, 750 фактаў апаганьвання збудаванняў і псавання маёмасці, каля 600 абразаў прадстаўнікоў улады, больш за 300 выпадкаў гвалту ці пагрозы яго ўжывання ў дачыненні да міліцыянтаў.
СК belsat.eu
