«Белсат» падводзіць вынікі 768-х содняў поўнамаштабнай вайны, распачатай Расеяй ва Украіне. Пра галоўныя падзеі станам на вечар 1 красавіка чытайце ў нашым аглядзе.
Купянскі і ліманскі кірункі (паўночна-ўсходняя частка Харкаўскай вобласці, захад Луганскай і поўнач Данецкай)
У Генеральным штабе Збройных сілаў Украіны паведамілі, што цягам апошніх содняў расейскія вайскоўцы атакавалі каля населеных пунктаў Церны і Верхнякаменскае на поўначы Данецкай вобласці, а таксама каля Белагораўкі на Луганшчыне, але прасунуцца не здолелі.
Праўкраінскі тэлеграм-канал «Офіцер» удакладняе, што Белагораўку гэтым разам войскі РФ штурмавалі выключна пяхотай.
Бахмуцкі кірунак (лінія фронту ў ваколіцах аднайменнага гораду ў Данецкай вобласці)
На бахмуцкім кірунку ініцыятыва таксама застаецца за расейскімі вайскоўцамі, якія наступаюць на захадзе і поўдні ад аднайменнага раённага цэнтру.
Украінскае камандаванне піша пра шэраг няўдалых атак праціўніка каля сёлаў Іванаўскае, Клішчыеўка і Андрэеўка.
Праўкраінскі «Говорять Снайпер» паведамляе, што таксама расейцы ціснуць у Багданаўцы: спачатку наносіцца масіраваныя артылерыйскія і авіяцыйныя ўдары, пасля чаго ў атаку ідзе пяхота пры падтрымцы FPV-дронаў. Паводле крыніцы, у сяле ўжо не засталося цэлых будынкаў, таму ЗСУ даводзіцца абараняцца ў руінах і падвалах.
У гэты ж час аналітыкі праекту Deepstate фіксуюць прасоўванні расейцаў паміж сёламі Багданаўка і Іванаўскае ў бок гораду Часаў Яр.
Яшчэ адна праўкраінская крыніца – «Бахмутський Демон» – удакладняе, што войскі РФ прасоўваюцца павольна, але метадычна, хоць і нясуць пры гэтым істотныя страты.
Прарасейскі канал «Два майора» сцвярджае, што цяпер УС РФ знаходзяцца на адлегласці аднаго кіламетра ад гораду. Пры гэтым сам Часаў Яр паралельна руйнуецца ўдарамі авіяцыі.
У Міністэрстве абароны РФ заявілі, што ўкраінскія вайскоўцы цягам содняў двойчы контратакавалі на захадзе ад гораду Горлаўка, але лінія сутыкнення засталася нязменнай.
Аўдзееўскі і навапаўлаўскі кірункі (на поўначы, захадзе і паўднёвым захадзе ад Данецку)
На аўдзееўскім кірунку Узброеныя сілы РФ наступаюць у ваколіцах населеных пунктаў Бэрдычы, Сямёнаўка, Уманскае, Первамайскае і Невельскае.
Між тым прарасейскія крыніцы сцвярджаюць, што УС РФ цалкам занялі сяло Вадзяное (на паўднёвым захадзе ад Аўдзееўкі). Пры гэтым удакладняецца, што адначасова з усталяваннем кантролю над сялом расейцы знішчылі мост, які вядзе да суседняга Первамайскага, каб пазбегнуць магчымых контратакаў.
Аднак у Мінабароны РФ пакуль ніяк не пракаментавалі сітуацыю ў сяле Вадзяное.
Расейскі ваенкор Сямён Пегаў гаворыць, што таксама УС РФ прасоўваюцца на заходніх ускрайках Первамайскага, паступова выціскаючы ўкраінцаў з сяла.
Пры гэтым у населеных пунктах Сямёнаўка і Бэрдычы ЗСУ актыўна контратакуюць, імкнучыся адкінуць праціўніка.
На навапаўлаўскім кірунку атакі расейцаў фіксуюцца ў ваколіцах сёлаў Георгіеўка, Пабеда і Вадзяное (на паўднёвым захадзе ад гораду Мар’інка) – не менш за 22 за содні. Істотных зменаў лініі сутыкнення тут не адзначаецца.
Бярдзянскі, арэхаўскі і херсонскі кірункі (захад Данецкай, а таксама Запарожская і Херсонская вобласці)
На бярдзянскім кірунку расейцы зноў намагаліся прасунуцца ў ваколіцах сяла Старамаёрскае на паўднёвым захадзе Данецкай вобласці, але поспеху не дасягнулі.
У Запарожскай вобласці баявыя дзеянні лакалізуюцца на выступе па фронце з поўдня ад гораду Арэхаў паміж сёламі Вэрбовае і Работына.
Пегаў сцвярджае, што расейцы прасунуліся на паўночным захадзе ад першага населенага пункту, але пра сур’ёзныя змены фронту гаворка не ідзе.
Канал «Два майора» паведамляе, што таксама войскі РФ рухаюцца з захаду на Работына, пры гэтым поўдзень сяла ўжо знаходзіцца пад іхным кантролем.
У Херсонскай вобласці Узброеныя сілы РФ двойчы атакавалі на левым беразе Дняпра, імкнучыся выбіць праціўніка з займаных плацдармаў, але поспеху не мелі.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
