Калісьці прэзідэнт Украіны меў тытул «Самы прыгожы мужчына Украіны» і пісаў сцэнары да святаў украінскіх алігархаў. А цяпер Уладзімір Зяленскі – галоўнакамандуючы краіны, якая 8 гадоў вядзе вайну з Расеяй. Вашай увазе – дайджэст кар’еры Зяленскага.
Гэты чарнявы хлопчык на фота – будучы прэзідэнт. Уладзімір Зяленскі сядзіць на руках сваёй маці, спадарыні Рымы. Нарадзіўся ён у Крывым Розе ў Днепрапятроўскай вобласці. У дзяцінстве жыў 4 гады ў Манголіі: там працаваў ягоны бацька. Скончыў там першы клас, пасля чаго сям’я вярнулася ў Крывы Рог. Цяпер тата – спадар Аляксандр – загадчык кафедры інфарматыкі ва ўніверсітэце. Бацькі не пераехалі ў Кіеў.
У 11-м класе Уладзімір зарганізаваў школьную каманду КВЗ, а пазней быў запрошаны ў каманду «Транзіт».
Мы знайшлі ягонае інтэрв’ю 1998 года. Зяленскаму тут 20, ён грае ў КВЗ на фестывалі ў Сочы.
Маладзён распавядае, што Маслякоў урэзаў музычныя нумары ягонай камандзе. А судзейства на гумарыстычным конкурсе, на меркаванне Зяленскага, было несправядлівым.
Мы знайшлі запіс той гульні. У тагачасным КВЗ яшчэ было шмат палітычных жартаў:
Адначасова з Зяленскім у каманду «Транзіт» прыйшлі некалькі будучых актораў студыі «Квартал 95». Зяленскі і яшчэ адзін стваральнік каманды, Дзяніс Манджосаў, скончылі гімназію № 95, якая месцілася ў раёне 95-ы квартал. Назва калектыву нарадзілася сама сабою. Уладзімір стаўся не толькі акторам ды капітанам, але і адным з асноўных аўтараў. Каманда паспяхова выступала ў найвышэйшай лізе КВЗ. А потым зрабілася самастойным прадуктам. «95-ы квартал» займеў поспех праз палітычную сатыру.
У 2004 годзе Зяленскі вядзе кулінарнае шоу «Містар Кук».
На пытанне, чаму менавіта яго выбралі вядоўцам, у адным з інтэрв’ю Зяленскі адказаў так: «Напэўна, ёсць нейкі збег акалічнасцяў, што прыводзіць да станоўчых вынікаў. Заўсёды заўважаў за сабою цікавую асаблівасць: не стараюся быць добрым адразу, а потым выклікаю прыхільнасць да сябе. Таму, калі прыйшоў спрабавацца на ролю вядоўцы, адмыслова, каб спадабацца, нічога не рабіў».
У пачатку 2005 года студыя «Квартал 95» і тэлеканал «Інтер» прыступілі да вытворчасці праекту «Вечаровы квартал».
У 2008 годзе шоўмен атрымаў тытул «Самы прыгожы мужчына Украіны» паводле версіі часопісу «Viva!».
Таксама ў 2008 годзе выйшаў першы сезон тэлесерыялу «Сваты». Зяленскі – галоўны прадзюсар.
Гісторыя пра дзве пары бабуль і дзядуляў з супрацьлеглымі поглядамі на жыццё мела вельмі высокія рэйтынгі ў расейскамоўных краінах.
Паспяховы праект «Рассмяшы коміка» паўстаў у 2011-м, у журы якога Зяленскі сядзеў разам з Міхаілам Галусцянам, а затым з Яўгенам Кашавым. А таксама Зяленскі быў у журы праграмы «Ліга смеху» ў 2014-м, створанай на падабенства КВЗ.
Прыблізна ў 60 кінакарцінах Зяленскі значыцца акторам, прадзюсарам, сцэнарыстам або рэжысёрам. Напрыклад, у фільме «Каханне ў вялікім горадзе» – рымейку «Службовага раману» – актор грае Анатоля Навасельцава.
Серыял стаўся фактычна перадвыбарчай кампаніяй Зяленскага. Наўмысна ці не, дакладна невядома. Прэмʼера першага сезону на ўкраінскім тэлеканале «1+1» адбылася ў 2015 годзе.
Паказ серыялу ў Расеі: 9 снежня 2019 года ў межах «нармандскага фармату» прайшла першая сустрэча Пуціна і Зяленскага. А 11 снежня 2019-га серыял пачаў транслявацца на расейскім тэлеканале ТНТ. Аб прэмʼеры стала вядома за содні да паказу. Спачатку быў выразаны жарт са згадваннем Пуціна і адсылкаю да ўкраінскай крычалкі. А пасля першых трох серыяў канал прыбраў серыял з праграмы трансляцыі.
Паказ серыялу ў Беларусі: паказалі ўсе сезоны «небяспечнага» серыялу, пры гэтым не выразалі жартаў пра Лукашэнку.
Зяленскі кажа, што задумаўся пра паход у палітыку толькі ў 2018 годзе. Аднак Бі-Бі-Сі спасылаецца на знаёмых з камандаю Зяленскага, якія сцвярджаюць, што першыя сацыялагічныя замеры наконт магчымага ўдзелу коміка ў выбарах праводзіліся яшчэ ў 2017 годзе.
Разам з Зяленскім з праекту ва ўладу сышлі больш за 30 «кварталаўцаў» і іх сяброў. Напрыклад, галоўны юрыст кампаніі Іван Баканаў узначаліў СБУ. Сяргей Шэфір, які кіраваў студыяй і прасоўваў яе кантэнт, стаў першым памочнікам прэзідэнта.
Сацыялагічныя апытанні ва Украіне казалі, што людзі гатовыя галасаваць за медыйных асобаў, якія не былі раней звязаныя з палітыкаю: напрыклад, за актора Зяленскага ці лідара гурта «Океан Ельзи» Святаслава Вакарчука. Але Вакарчук ад удзелу ў выбарах адмовіўся.
Сёмыя выбары прэзідэнта Украіны праводзіліся ў два туры. Першы выйграў Уладзімір Зяленскі, але ён не набраў больш за 50 % галасоў, таму быў прызначаны другі тур. У другім ён набраў 73,23 %.
У звязку з вайною Зяленскі трапіў на сусветна вядомыя вокладкі. Амерыканскі комік Баравіц назваў Зяленскага фаварытам прэзідэнцкай гонкі 2024 года ў ЗША.
Прэзідэнта і народ Украіны намінавалі на Нобэлеўскую прэмію міру.
У самой Украіне дзеянні прэзідэнта Зяленскага ў пачатку вайны падтрымлівалі больш за 90 % украінцаў.
У перадвыбарчай кампаніі Уладзімір Зяленскі казаў, што будзе абірацца толькі на адзін прэзідэнцкі тэрмін.
Калегі з «Кварталу 95» не выключалі, што Зяленскі вернецца да акторскай дзейнасці.
АГ belsat.eu