Лукашэнка даручыў «выпальваць гарачым жалезам» крамы, якія не прадаюць беларускіх тавараў
Аляксандр Лукашэнка, прымаючы 1 красавіка першага віцэ-прэм’ера Мікалая Снапкова і міністра антыманапольнага рэгулявання і гандлю Уладзіміра Калтовіча, заявіў пра неабходнасць рэпрэсіяў супраць аб’ектаў гандлю.
Лукашэнка заявіў, што, нягледзячы на абавязкі ў межах ЕАЭС, «ёсць вялікія пытанні і да органаў кіравання, якія павінны кантраляваць і рабіць адпаведныя захады для абароны ўнутранага рынку і нашых таваравытворцаў», перадае president.gov.by.
Паводле яго, гэтае ды іншыя пытанні падымалі ўласна беларускія вытворцы:
«Мы сёння вырабляем велізарны спектр тавараў спажывання. А ў асобных нашых гэтак званых супермаркетах і крамах мы гэтага не бачым. Дайшло да таго, што некаторыя з іх – гэта ўжо праваахоўныя органы разбіраюцца – проста адмаўляліся браць у рэалізацыю беларускія тавары».
Пры гэтым Лукашэнка выказаў шкадаванне, што пра гэта яму распавёў не міністр Калтовіч:
«Гэта сведчыць пра тое, што тыя даручэнні, якія мною дадзеныя вам, перш за ўсё, прафсаюзам і дэпутатам (урад мы з гэтага спісу не выключаем, натуральна), як мінімум не зусім выконваюцца. Падобныя рэчы трэба не проста спыняць, а выпальваць гарачым жалезам», – падкрэсліў Лукашэнка.
У лютым Аляксандр Лукашэнка на Усебеларускім народным сходзе заявіў, што загадаў сілавікам заняцца адною з гандлёвых кампаніяў, якая больш не будзе працаваць. Журналісты мяркуюць, што гаворка пра сетку крамаў «Green».
МГ belsat.eu
