52 % за Ціханоўскую і 17,6 % за Лукашэнку. Нямецкія даследчыкі даведаліся, як галасавалі беларусы
Нямецкі навукова-даследчы інстытут ZOiS апублікаваў даследаванне на падставе праведзенага ў снежні 2020 года інтэрнэт-апытання грамадзянаў Беларусі пра грамадства і палітыку.
У апытанні ўзялі ўдзел больш за 2 тысячы беларусаў векам ад 16 да 64 гадоў, якія жывуць у гарадах з колькасцю насельніцтва больш за 20 тысячаў чалавек. Колькасць розных групаў апытаных вызначалася ў адпаведнасці з прапорцыямі паводле ўзросту, полу і месца жыхарства.
За каго галасавалі беларусы?
Паводле вынікаў апытання, 65 % рэспандэнтаў часткова або цалкам пагадзіліся з тым, што вынікі прэзідэнцкіх выбараў у жніўні 2020 года былі сфальсіфікаваныя на карысць Аляксандра Лукашэнкі. Найбольш такіх сярод мужчынаў і людзей з вышэйшай адукацыяй.
Крыху больш за 52 % удзельнікаў апытання заявілі, што на выбарах галасавалі за Святлану Ціханоўскую. За Аляксандра Лукашэнку прагаласавалі 17,6 % рэспандэнтаў. Супраць усіх – 8,4 %, за астатніх трох кандыдатаў – разам менш за 3 %. Адмовіліся адказваць на пытанне 18,6 %.
Аляксандра Лукашэнку найбольш падтрымлівалі людзі старэйшага пакалення і жанчыны, жыхары невялікіх паселішчаў, людзі з больш высокімі даходамі, а таксама паслядоўнікі праваслаўнай царквы. А вось Святлана Ціханоўская была больш папулярная сярод мужчынаў, студэнтаў, жыхароў вялікіх гарадоў, занятых у прыватным сектары. Толькі чвэрць з тых, хто галасаваў за Лукашэнку, падтрымалі яго, бо ён рэпрэзентаваў іхныя палітычныя погляды.
Каля 14 % апытаных заявілі, што бралі ўдзел у акцыях пратэсту пасля выбараў. Гэта прыблізна 700 тысяч асобаў з 5 мільёнаў жыхароў Беларусі, узроставыя ды іншыя групы якіх ахоплівае даследаванне. Каля паловы апытаных асабіста ведаюць асобу, якая брала ўдзел у пратэстах.
Каму давяраюць беларусы
Давер да беларускіх палітычных структураў у цэлым застаецца нізкім і да многіх яшчэ знізіўся. Прыкладна аднолькава ўпаў давер насельніцтва да органаў выканаўчай, заканадаўчай і судовай уладаў, а таксама праваахоўных органаў. Найбольшая колькасць апытаных давярае Каардынацыйнай радзе і Беларускай Праваслаўнай Царкве.
Гвалт сілавікоў, паводле даследавання, стаўся важным фактарам ва ўзмацненні страху і заклапочанасці сярод беларускіх грамадзянаў.
Апытанне таксама паказала, што сацсеткі ды інтэрнэт-медыі дамінуюць у інфармацыйным полі беларускага грамадства: больш за 70 % апытаных выкарыстоўваюць іх як асноўная крыніцы звестак пра актуальныя падзеі.
Погляды на нацыянальны сцяг падзяліліся: 41 % апытаных лічаць цяперашні дзяржаўны сцяг прымальным сімвалам дзяржавы, а 36 % аддалі перавагу бел-чырвона-беламу.
МГ belsat.eu
