У Гомлі могуць завесці крымінальную справу пасля затрымання амаль 200 падлеткаў
Увечары 28 лютага ў Гомлі затрымалі 200 асобаў, 183 з іх – няпоўнагадовыя. Іх схапілі за «спробу правядзення масавай акцыі», гаворыцца ў справаздачы МУС Беларусі. Міліцыя пачала праверку і не выключае, што будзе заведзеная крымінальная справа.
Сілавікі ўчынілі «хапун» каля гандлёва-забаўляльнага цэнтру «Секрет». Там, паводле заявы Міністэрства ўнутраных справаў, сабраліся прыхільнікі арганізацыі, якую яны па-расейску называюць «ЧВК Рёдан».
«Супрацоўнікі міліцыі аператыўна адрэагавалі на спробу правядзення незаконнага масавага мерапрыемства. Без ужывання гвалту ў органы ўнутраных справаў даставілі 200 чалавек, 183 з якіх – няпоўнагадовыя», – гаворыцца ў паведамленні.
Падлеткаў да 16 гадоў паставяць на ўлік у інспекцыях у справах няпоўнагадовых, таксама яны атрымаюць папярэджанні. Тым, каму болей за 16, прыгразілі адміністратыўнаю адказнасцю.
Міліцыя цяпер шукае асобаў, датычных да арганізацыі «незаконнай масавай акцыі». Імаверна, будзе заведзеная крымінальная справа, падсумавалі ў МУС.
Раней паведамлялася, што ў Гомлі затрымалі 50 маладзёнаў. Відавочцы сцвярджалі, што міліцыянты білі падлеткаў гумавымі дручкамі.
Увечары бацькі збіраліся пад дзвярыма Цэнтральнага РУУС гораду, каб высветліць лёс сваіх дзяцей.
Сяргей Крот belsat.eu
