Больш за сто чалавек узялі ўдзел у першым фестывалі электрычнага транспарту «Minsk Electro Day». У праграме фестывалю – майстар-класы, прэзентацыя тэхнікі і спаборніцтвы паміж удзельнікамі на розных відах электрычнага транспарту. Праводзіцца імпрэза першы раз.
«Адна з мэтаў фестывалю – пазнаёміцца і стварыць такую суполку прыхільнікаў электратранспарту. Каб потым збірацца на іншыя фестывалі і актыўна бавіць вольны час», — кажа Вольга Гаўрашка, арганізатарка фестывалю.
Сярод удзельнікаў – вядомая тэлевядоўца і блогерка Ганна Бонд. Яна прызнаецца, што сёння ехала на электрасамакаце другі раз у жыцці.
«Хуткасць ідзе, і ты не марнуеш аніякай энергіі. Гэта крута. Некаторыя мужчыны ехалі, і ў іх соплі віселі ад задавальнення. Я ў акулярах, бо ў вочы вецер дзьме. Вельмі зручна. Няхай гэта разрастаецца», — дзеліцца эмоцыямі яна.
Наведніца фестывалю Ксенія кажа, што прыйшла сюды, каб пазнаёміцца з аднадумцамі. Яна набыла свой электрасамакат у чэрвені ды захапілася новым відам транспарту. Цяпер – амаль заўсёды перасоўваецца на ім.
«Я сяброўка розных чатаў нашых самакатных, і колькі мы ўлетку ні спрабавалі сабрацца, людзей шмат, але збіраліся максімум пяць чалавек. Прыйшла сюды паглядзець, колькі людзей».
Наведнікі фестывалю кажуць, што асноўныя перавагі электрычнага транспарту – яго экалагічнасць, камфорт і зручнасць у карыстанні.
Карыстацца электрасамакатам вельмі проста: адштурхоўваешся, націскаеш рычаг і едзеш.
Арганізатары спадзяюцца, што «Minsk Electro Day» стане традыцыйным для Беларусі. І плануюць наступны правесці ўжо ўвесну – на адкрыцці новага сезону.
Ксенія Тарасевіч, «Белсат»
