Аб'ектыў 18.08.2019 Жыхары Фаніпалю пісалі зварот Лукашэнку, а да іх прыйшла міліцыя


Жыхары Фаніпалю захацелі жыць добра, а ўлады Фаніпалю даслалі міліцыю з пратаколам. Каб аб бедах у горадзе-спадарожніку сталіцы даведаліся ў Менску, больш за 400 мясцовых жыхароў падпісала калектыўны зварот у абласную пракуратуру, Камітэт дзяржкантролю і Адміністрацыю кіраўніка дзяржавы.

Усё пачалося з праблемнага дому № 5 на вуліцы Берасцейская. Людзі тут жывуць, а камунальныя службы не працуюць, пакуль забудоўнік не аддасць доўгу.

«У сакавіку было халодна, не было ацяплення, а ў нас малое дзіця. У кватэры было халодна».

Жыхары Фаніпаля купілі новыя кватэры, а дом руйнуюць!

«Не паўсюль святло ў нас працуе ў пад‘ездзе, і навокал тэрыторыі таксама асвятлення няма».

«Дарогі разрытыя, разбураныя, немагчыма ні пакатацца з дзецьмі, ні прайсці – цяпер школы пачнуцца, садочкі, не дайсці ні да садкоў, ні да школаў», – пералічваюць праблемы жыхары дому.

Перакапаныя і разбітыя дарогі, гнілыя трубы, пакладзеныя з парушэннямі тэхналогіі, пастаянныя адключэнні вады па ўсім горадзе – гэтыя праблемы фаніпальцы патрабуюць расследаваць з адмысловаю камісіяй. Таксама просяць зарганізаваць нарэшце аўтобус ад Фаніпалю да метро «Малінаўка», каб людзі маглі ездзіць на працу.

Пракуратура прызначыла новую праверку па факту збіцця міліцыянтамі жыхара Фаніпаля

Подпісы ў ліпені сабраў жыхар таго самага праблемнага дому Дзмітрый Шчаглоў, праз сацыяльную сетку запрасіў людзей сабрацца пад крамай. У выніку каля крамы стаяла машына з людзьмі ў цывільным, а праз пару дзён дадому да Шчаглова прыехала 4 міліцыянты з пратаколам.

«Я на падставе закону №300-3 аб зваротах грамадзянаў збіраў подпісы. Там не ўстаноўлены парадак, час і спосаб збору. А яны гэта спрабуюць падаць, што не проста так… Ім нехта сказаў куды пад’ехаць і што зрабіць», – распавядае Дзмітрый Шчаглоў.

Як патлумачыў фаніпальскі ўчастковы Ягор Навіцкі, Шчаглоў нібыта парушыў закон аб масавых мерапрыемствах, бо запрасіў людзей сабрацца без дазволу гарвыканкаму.

Міліцэйскае бязмежжа ў Фаніпалі: маладзёна білі і смяяліся

Паводле Закону аб масавых мерапрыемствах, грамадзяне, каб самастойна сабрацца для чаго-кольвек, мусяць зараней атрымаць дазвол ад мясцовых уладаў, дадаткова аплаціць паслугі міліцыі, хуткай дапамогі і камунальных службаў. Змены ўвялі пасля хвалі сацыяльных пратэстаў у розных гарадах Беларусі.

«У нас ёсць ад 2018-га года адказ ад Палаты прадстаўнікоў, я яго зачытаю: збор подпісаў грамадзянаў пад калектыўным зваротам не парушэнне заканадаўства аб масавых мерапрыемствах. То бок гэта азначае, што і міліцыя не ведае заканадаўства, якое яна павінна абараняць», – каментуе сустаршыня руху «Гавары праўду» Андрэй Дзмітрыеў, які 3 гады таму спрабаваў стаць дэпутатам Палаты прадстаўнікоў ад Фаніпаля.

Падобна, гэтаксама пакуль палічыў і суд Дзяржынскага раёну. Але суддзя не прызнаў адміністратыўнага пратаколу аб парушэнні закону нядзейным, а аддаў яго міліцыянтам на дапрацоўванне.

Яраслаў Сцешык, «Белсат»

Глядзі таксама
Каментары