Журналістку выдання «Наша Ніва» Наталлю Лубнеўскую сёння выпісалі са шпіталю. Дзяўчына правяла ў лякарні больш за месяц – пасля ранення гумоваю куляю.
«Выпісвалася з адкрытым бальнічным, то бок мне яшчэ трэба будзе нейкі нагляд, перавязкі, плюс дома даглядаць за ранай, ёсць пэўныя нюансы. Цалкам загоіцца яна, можа, праз месяц», – раказвае Наталля.
Наталлю паранілі ў калена 10 жніўня. Жаўнер невядомага падраздзялення страляў у журналістаў мэтанакіравана. Да дзяўчыны прыходзілі следчыя, па факце праводзіцца праверка. Ніякай крымінальнай справы не распачалі. Ні выбачэнняў, ні кампенсацыі.
«Я закон не парушала, не я калечыла людзей, не я страляла. Таму чаму я павінна баяцца? Канеяне, мне няёмка звязвацца з гэтай сістэмай, бо я бачу, што адбываецца, што законаў няма, няма ніякіх правілаў гульні», – кажа Наталля.
Сёння на волю выйшаў наш гомельскі калега Андрэй Толчын. За кратамі ён трымаў сухую галадоўку. Журналіста затрымалі яшчэ напярэдадні акцыяў у выходныя, проста ля дому.
«Вось тут, менавіта на гэтым месцы былі два чалавекі ў цывільным, яны мяне затрымалі зранку, мы збіраліся ісці з жонкаю на базар», – расказвае Андрэй Толчын.
У выніку – 5 содняў арышту за ўдзел у несанкцыянаваным мерапрыемстве.
«І суддзі, і міліцыя, і падатковыя, і іншыя дзяржаўныя службы фактычна зʼяўляюцца вузламі, элементамі рэпрэсіўнай машыны. І гэта рэпрэсіўная машына ўжо не кіруецца законамі. Яна кіруецца загадамі», – перакананы журналіст.
У такіх умовах сёння мелася б святкаваць юбілей Беларуская асацыяцыя журналістаў, арганізацыя, якая няспынна бароніць правы журналістаў і змагаецца за свабоду слова ў нашай краіне.
«Сёння мы адмовіліся ад святкавання 25-годдзя. Бо цяпер у Беларусі ідзе вайна з журналістамі, літаральна кожны дзень мы маем затрыманні нашых калег, літаральна кожны дзень нашыя калегі ёсць за кратамі, ідуць суды бясконцыя», – кажа намеснік старшыні БАЖ Барыс Гарэцкі.
У Гомлі па-ранейшаму за кратамі застаюцца Марына Драбышэўская і Яўген Меркіс. У Менску – Аляксандр Васюковіч і Уладзь Грыдзін. Усім закідаюць удзел у несанкцыянаваным масавым мерапрыемстве.
Наста Кахановіч, «Белсат»
