У Купалле – дзень Купалы. Роўна 137 гадоў таму нарадзіўся народны пясняр Беларусі Янка Купала. Сёння да помніку паэту ў Менску аматары ягонай творчасці неслі кветкі.
«Ведаеце, у кожнага народу існуюць знакавыя постаці. Постаці, якія вызначаюць яго самасвядомасць. Постаці, якія вызначаюць яго душу, яго мару ўрэшце. І такой постаццю з’яўляецца Янка Купала, Якуб Колас, Максім Багдановіч. Гэта тыя тры слупы, калі можна казаць, на іх будуецца жыццё і дух народу», – кажа пісьменнік Навум Гальпяровіч.
А вось наколькі творчасць песняра ведае беларускі народ?
«Янка Купала – наш вялікі паэт. Я ведаю ягоны пачатак вершу. «Ад прадзедаў спакон вякоў нам засталася спадчына».
«Янка Купала – беларускі паэт. «Я мужык-беларус, пан сахі і касы».
«А Божа мой, а Божа мілы, якія ж млосныя ў іх рылы».
«Гэта больш чым паэт. Я перакананая, што для нас, для беларусаў, гэта асоба нумар адзін. Гэта той чалавек, які заўсёды думаў аб сваёй краіне. Тое свята, на якое мы зараз едзем з адною думкаю – аб шчасці Беларусі. Мне падаецца, што гэта эпіграф да ўсяго жыцця і творчасці Янкі Купалы».
«З адною думкаю аб шчасці Беларусі»: менавіта пад гэткаю назвай у Вязынцы, на малой радзіме Янкі Купалы, сёння і прайшло свята паэзіі, песні ды народных рамёстваў.
«Вельмі радыя, што ў нашага свята ёсць такое слова, такі эпітэт – традыцыйнае. Традыцыйнае свята паэзіі і народных рамёстваў, якое называецца радком з вершу Янкі Купалы: «З адною думкаю аб шчасці Беларусі», – кажа Вольга Пархімовіч з дзяржаўнага літаратурнага музею Янкі Купалы. Наведнікі свята так сама падзяліліся ўражаннямі.
«Мне вельмі падабаюцца ягоныя вершы. Асабліва песні ў выкананні ансамблю «Песняры».
«Побач лецішча, таму я штогод прыходжу сюды і атрымліваю вялікае задавальненне ад таго, што далучаюся да фальклору. Песням, вершам».
«Мой родны кут! Як ты мне мілы, забыць цябе не маю сілы».
«Што такое Купала для Беларусі? Купала для Беларусі – гэта ўсё. Гэта сімвал Беларусі. Гэта душа Беларусі. Гэта гонар Беларусі».
Свята такога кшталту праводзяць у Вязанцы 47-мы раз. Дарэчы, дзень народзінаў першага народнага паэта Беларусі адзначаюць ня толькі на радзіме. Урачыстыя імпрэзы ладзяцца ў Польшчы, Украіне, Чэхіі ды іншых краінах.
Ян Вярбіцкі, «Белсат»
