Аб'ектыў 18.04.2019 Выйшаў з суда і пайшоў рабіць блог. Сяргею Пятрухіну далі 17 680 рублёў штрафу за «абразу» міліцыянтаў


Берасцейскі блогер Сяргей Пятрухін атрымаў сёння 17 тысячаў 680 рублёў штрафу за «абразу» і «паклёп» на міліцыянтаў. Гэта найбуйнейшы штраф журналістам і блогерам за апошнія гады. Колькі каштуе беларуская свабода слова і як яе ацанілі ў свеце?

Аляксандр Семянчук, суддзя:

«Прызначыць Сяргею Пятрухіну пакаранне на падставе арт. 188 ч.2 КК Рэспублікі Беларусь «Паклёп» і арт. 189 ч.2 «Абраза».

Штраф разам з судовымі выдаткамі склаў BR 17 680 руб. Пракурор прасіў абмежаваць волю Сяргею Пятрухіну на 2 гады з накіраваннем у папраўчую ўстанову адкрытага тыпу. Сам блогер гэта каментуе так:

«Пануе мянтоўскае бязмежжа, таму я думаў што мне дадуць «хімію», але я занадта не цешуся. Бо Мікола Самасюк гэтага так проста не пакіне».

На youtube-канале «Народны рэпарцёр» знойдзем усе прычыны, з якіх Сяргей Пятрухін можа не падабацца міліцыянтам і ўладам… Дае слова пакрыўджаным дзяржаваю, крытыкуе недакранальных, разам з сотнямі берасцейцаў актыўна супрацьстаіць запуску заводу свінцова-кіслотных акумулятараў пад Берасцем. Хто такі Пятрухін – ведае ці не кожны чацвёрты берасцеец:

«Ён скандальныя сітуацыі ў горадзе разбірае».

«Я чуў пра такога, ён змагаецца з ветракамі ў выглядзе нашых дзяржаўных органаў».

«Нібыта ён абазваў міліцыянта, але я лічу, што гэта не абзыванне, гэта літаратурныя словы».

«Недзе яго інтарэсы не супалі з інтарэсамі ўладаў».

У суд сёння прабіліся не ўсе ахвочыя… Большасць месцаў яшчэ да працэсу занялі міліцыянты, якіх у залю запусцілі праз чорны ўваход.

«Яны паказваюць – глядзіце, мы вас адмыслова сюды прывялі, каб вы ведалі – вам можна ўсё! Тут жа і кіраўніцтва іхнае прысутнічае, паказвае: «Мы з вамі! Мы вас падтрымаем!» Вы рабіце, а ў нас хопіць адміністратыўнага рэсурсу на тое, каб усіх запалохаць і перасадзіць!» – распавядае Сяргей Пятрухін.

Каб застацца на працэсе, грамадскі актывіст Віталь Казак мусіў здабываць сабе дадатковае крэсла.

Наперадзе – працэдура абскарджання. Праваабаронца Раман Кісляк:

«Будзем вывучаць гэтую справу. Абскарджваць будзе пэўна сам Сяргей Пятрухін, а таксама грамадзяне, у стасунку якіх парушылі правы, калі яны прысутнічалі на судовым паседжанні».

Гэтая справа – толькі хваля ў плыні ціску на незалежныя медыі – мяркуе сябра руху «За свабоду» Вольга Быкоўская.

Летась быў беспрэцэдэнтны пераслед журналістаў незалежных медыяў – адзначылі праваабаронцы міжнароднай арганізацыі «Рэпарцёры без межаў» у сваёй штогадовай справаздачы. У «Сусветным індэксе свабоды прэсы» зноў маем нізкую ацэнку – 153 са 180 месцаў.

«Дзякуй вялікі, сябры, што прыйшлі мяне падтрымаць», – кажа Сяргей Пятрухін.

Падтрыманне грамадскасці спатрэбіцца і ў аплачванні непамерна вялікага штрафу, на якое суд даў Пятрухіну 1 месяц.

Юлія Цяльпук, belsat.eu

Глядзі таксама
Каментары