Вуліцу Камсамольскую адкрылі пасля рэстаўрацыі ўсяго паўгода таму. Але яна ўжо заржавела. Усе металічныя элементы зазналі карозію.
Сярод апытаных намі мінакоў хтосьці гэтага не заўважае, іншыя лічаць, што «гэтак і трэба».
«Затое як быццам з гісторыяй. Быццам не ўчора з’явілася, а даўно. І турысту прыемней».
«Рабілі, відаць, на хуткасць, каб хутчэй здаць аб’ект, і так атрымалася. Проста прыйдзецца перарабляць нанова, ці не звяртаць увагі».
«Як многае, што ў нас адбываецца, робяць, а праз паўгода глядзіш, і не дужа прыемна яно выглядае».
«Ну мы ж у Беларусі жывем. Пяць іржавых ланцугоў з пяці».
Агулам, у рэканструкцыю сталічнай Камсамольскай і суседняй Рэвалюцыйнай гарадскія ўлады ўклалі не менш за 1 мільён 100 тысяч долараў.
«Люкі першапачаткова былі проста не пафарбаваныя, калі прайсці па вуліцы, яны іржавыя, гэта адбылося не з-за таго, што зіма была, а проста, калі здалі вуліцу, яны прывезлі большасць люкаў непафарбаванымі з заводу. Гэта новыя люкі аднаго з беларускіх заводаў», кажа Віктар Бакун, грамадскі актывіст, жыхар вул. Камсамольскай.
Праект выклікаў шмат крытыкі сярод актывістаў і жыхароў гораду, але іхнага меркавання не ўлічвалі.
«У цэлым нашае грамадства не прывучанае здзельнічаць у працэсах, яны самі па сабе праходзяць дзесьці рандомна, сярод тых, хто хацеў зарабіць. І хто быў звязаны з тым, што закупіць».
«Будаўнікі безадказныя. Калі элементарная іржа, яе трэба прыбіраць, а потым фарбаваць. Ну а калі, цяп-ляп, на свята гораду – малайцы, паспелі».
Цяпер паспелі прыбраць самыя ржавыя металічныя элементы.
Раней тут віселі ланцугі. Але пасля таго, як яны саржавелі, менчукі сталі актыўна выстаўляць фотаздымкі ў сацыяльныя сеткі. І іх знялі.
У «Менскай спадчыне», якая займалася рэканструкцыяй вуліцы, кажуць, што прычынай карозіі стала ўздзеянне супрацьгалалёдных рэагентаў. А пашкоджаныя элементы – гарантыйныя. Абяцаюць, што ў спрыяльнае надвор’е пастаўнікі ўсё пафарбуюць ды выкарыстаюць адмысловае пакрыццё, каб не дапусціць іржы.
«Калі саржавела, трэба было аб гэтым думаць».
«Гэтага трэба было чакаць. Дзіўна было б здзіўляцца, калі б жалеза не заіржавела з нашым кліматам. Можа, гэта была задума такая, я не ведаю, спытайце ў дызайнера. Сумнавата крыху».
Першапачаткова спецпакрыццё не было закладзенае ў праект. Ва ўмовах тэндару агаворвалася толькі афарбоўванне ўсіх чыгунных і стальных паверхняў алкіднай эмаллю. І сапраўды, снежная зіма ды галалёд у Беларусі – рэдкасць, а выкарыстанне рэагентаў – рэч нечуваная.
Вольга Чайчыц, Андрусь Козел,«Белсат»