Аб'ектыў 18.06.2019 Упершыню за 11 гадоў не ўручаць прэмію «За свабоду думкі» імя Васіля Быкава


15 лаўрэатаў, сярод якіх Рыгор Барадулін, Ніл Гілевіч, Лявон Вольскі. Прэмію «За свабоду думкі» імя Васіля Быкава выбітным беларусам уручалі 11 гадоў. Аднак сёлета ўганаравання ўпершыню не адбудзецца. Чаму?

Сёлета ў дзень народзінаў Васіля Быкава, 19 чэрвеня, у ягоных родных Бычках будзе не так гучна, як папярэднімі гадамі. Віной таму адмена сёлетняй цырымоніі прэміі імя Васіля Быкава «За свабоду думкі»

Уладзімір Арлоў, пісьменнік, лаўрэат прэміі імя Васіля Быкава:

«Я веру ў тое, што прэмія імя Васіля Быкава «За свабоду думкі» будзе неўзабаве адноўленая. Захаваюцца яе крытэры. Але я думаю, што сузаснавальнікамі гэтай прэміі павінныя стацца шырокае кола грамадскіх арганізацыяў».

Апошнімі гадамі каардынатар імпрэзы – грамадскае аб’яднанне Рух «За свабоду» – меў фінансавыя складанасці з арганізацыяй мерапрыемства. Няўжо на 12-ым годзе існавання ўзнагароду знішчыла грашовае пытанне?

Аляксандр Мілінкевіч, заснавальнік прэміі імя Васіля Быкава «За свабоду думкі»:

«Прэмія ніколі не мела мэтавага фінансавання, грошы мы заўсёды збіралі і даволі паспяхова. Летась мы рабілі гэта праз краўдфандынг, і людзі ахвяравалі грошы. Так што гэта другаснае пытанне. Самае галоўнае – 2 гады таму мы зразумелі, што прэмія патрабуе сур’ёзнага перафарматавання».

Дагэтуль намінантаў на прэмію Быкава абірала аўтарытэтнае журы. Гэтыя ж людзі патаемна галасавалі за пераможцу, якому акрамя звання лаўрэата і статуэткі даставалася грашовая ўзнагарода ў 1000 еўра. У новым фармаце абяцаюць іншы падыход.

«Прэмія Васіля Быкава мусіць стаць народнай. Не ўзнагародай, якую даюць вядомыя ў Беларусі людзі ці пэўныя арганізацыі, а гэта мусіць быць прэмія, у якой лаўрэата вызначае як мага большая колькасць людзей. Усе беларусы будуць мець магчымасць праз інтэрнэт вызначаць намінанта і пазней у фінале галасаваць за пераможцу», – тлумачыць Заснавальнік прэміі імя Васіля Быкава «За свабоду думкі» Аляксандр Мілінкевіч.

Яшчэ адной мэтай прэміі станецца папулярызацыя твораў Васіля Быкава і ягоных жыццёвых прынцыпаў. У рабочую групу па перафарматаванні ўзнагароды між іншага ўвайшлі Святлана Алексіевіч, Уладзімір Арлоў, Лявон Вольскі, Юры Зісер, Святлана Калінкіна, Глеб Лабадзенка і Зміцер Дашкевіч.

ІК, belsat.eu

Глядзі таксама
Каментары