Улады затрымалі дзясяткі збіральнікаў подпісаў

Шматтысячныя чэргі ў падтрыманне апанентаў Лукашэнкі і больш за дзясятак затрыманых сябраў ініцыятыўных групаў. Такі вынік 18-га дня збору подпісаў. Як паводзіны ўладаў ацэньваюць звычайныя грамадзяне і праваабаронцы – у матэрыяле Аляксандра Папко.

Прынамсі 11 чалавек міліцыянты затрымалі ў Гомлі і Менску. Там ішоў збор подпісаў за апанентаў Аляксандра Лукашэнкі. Сярод затрыманых – грамадская актывістка Вольга Мікалайчык і сустаршыня Беларускай хрысціянскай дэмакратыі Павел Севярынец.

Чарга, што расцягнулася да плошчы Якуба Коласа, ды аўтазакі ў навакольных дварах. У такой атмасферы збіралі подпісы ля Камароўскага рынку ў Менску.

Алега Баброўскага, сябра ініцыятыўнай групы Святланы Ціханоўскай, яшчэ перад пікетам затрымалі працаўнікі ДПС. Міліцыянты забралі ў яго паўтары тысячы раней сабраных подпісаў.

«Каля паўсотні ўдзельнікаў ініцыятыўнай групы ўжо затрыманыя. Нават сёння выхапілі аднаго чалавека. Кожны дзень з ініцыятыўнай групы нехта прападае», – паведаміў Кірыл Жуковіч, сябра ініцыятыўнай групы Святланы Ціханоўскай.

Яшчэ аднаго мужчыну схапілі на самым пачатку збору подпісаў.

«Двое бандытаў без апазнавальных знакаў, не прад’яўляючы дакументаў, схапілі чалавека, кінулі яго ў машыну – пры міліцыі, пры АМАПе! Я падышоў да АМАПу: «Хлопцы, вы каму служыце?!» – так апісаў затрыманне адзін са сведкаў.

На думку аднапартыйцаў, затрыманы – Валянцін Фралоў, сябра ініцыятыўнай групы сустаршыні БХД Вольгі Кавальковай.

«Я прашу Міністэрства ўнутраных справаў паведаміць мне як прэтэндэнту, дзе знаходзіцца сябра маёй ініцыятыўнай групы, і завесці крымінальную справу па факце выкрадання Валянціна Фралова!» – заявіла патэнцыйная кандыдатка на прэзідэнцтва.

Пакуль што Міністэрства ўнутраных справаў паведаміла пра крымінальную справу за «гвалт супраць міліцыянтаў». Па ёй праходзяць блогер Сяргей Ціханоўскі і яшчэ 9 чалавек, затрыманых 29 траўня ў Горадні.

«Тое, што адбывалася ў Горадні, тое, што стала непасрэдна фармальнай падставай для затрымання і ўзбуджэння крымінальнай справы і далейшых следчых дзеянняў па справе, – там была відавочная правакацыя», – пракаментаваў старшыня Беларускага Хельсінкскага камітэту Алег Гулак.

Ці выставіць пракуратура абвінавачанні Ціханоўскаму ды ягоным паплечнікам, мы даведаемся заўтра. Артыкул, паводле якога распачалі крымінальную справу, прадугледжвае да 6 гадоў турмы.

А ўчора ўвечары ў Віцебску міліцыянты затрымалі сябра ініцыятыўнай групы Святланы Ціханоўскай Аляксандра Мацеюка. Два тыдні таму яго ўжо каралі арыштам за ўдзел у сустрэчы з блогерам Ціханоўскім. За 18 дзён выбарчай кампаніі міліцыянты затрымалі каля пяцідзесяці чалавек. Як падкрэсліў Алег Гулак, такіх рэпрэсіяў на старце выбараў праваабаронцы яшчэ не бачылі.

Аляксандр Папко, «Белсат»

Падпісвайся на telegram Белсату

Глядзі таксама