Аб'ектыў 19.03.2019 Улады Беларусі вырашылі дэпартаваць грамадзяніна Ірану, якому на радзіме пагражае смяротнае пакаранне


Улады Беларусі прынялі рашэнне аб дэпартацыі грамадзяніна Ірану Мерхдата Джамшыдыяна. На радзіме яму пагражае смяротнае пакаранне. Падрабязнасці ў Насты Кахановіч.

«Гэта мамін Дзень народзінаў, ёй 47 год і тата замовіў ёй ружы», – паказвае Дзіяна Джамшыдыян фота.

Гэта апошні здымак бацькоў Дзіяны разам. Тата дзяўчыны ўжо паўгода застаецца ў следчым ізалятары.

«Гэта вельмі цяжка, балюча глядзець на маму», – кажа Дзіяна.

Грамадзянін Ірану Мэрхдат Джамшыдыян жыве ў Беларусі больш за 20 гадоў і, за выключэннем апошніх двух гадоў, меў рэгістрацыю. Але ўжо сем гадоў Іран просіць выдаць мужчыну, бо яго падазраюць у забойстве. Дагэтуль беларускі бок адмаўляўся запускаць працэдуру экстрадыцыі праз адсутнасць пераканаўчых доказаў. Калі мужчыну прызнаюць невінаватым, яму ўсё адно пагражае смяротнае пакаранне.

«Я змяніў веру, іслам на хрысціянства, гэта было ў 2002 годзе», – разказваў Мэрхдат Джамшыдыян.

У чэрвені мінулага года мужчыну затрымалі праз адсутнасць беларускай рэгістрацыі. Дзіяна і ейная маці дазволу на спатканне не атрымалі.

«Апошнія пару месяцаў, напэўна, месяцы 3–4, лісты перасталі даходзіць, як нашыя яму, так і ягоныя да нас. Адзіная сувязь нашая была – лісты. Але цяпер – толькі адвакат», – кажа Дзіяна.

Міністэрства ўнутраных справаў адмовіла надаць мужчыну статус уцекача. Мэрхдат даведаўся, што на пазамінулым тыдні прынялі рашэнне аб высылцы. Пры гэтым дэпартацыя Мэрхдата ў Іран – незаконная.

«У беларускім законе «Аб прававым становішчы замежных грамадзянаў і асоб без грамадзянства» ёсць артыкул 17.1, які кажа, што нельга высылаць з тэрыторыі Беларусі ў краіну, дзе чалавеку пагражаюць катаванні і смяротнае пакаранне», – тлумачыць Эніра Браніцкая з праваабарончай арганізацыі Human Constanta.

Штогод статус уцекача ў Беларусі запытваюць некалькі соцень чалавек. Але атрымліваюць яго адзінкі: пазалетась статус надалі толькі пяці чалавекам, падавалі ж хадайніцтва – больш за 700. Міністр унутраных справаў Ігар Шуневіч два гады таму тлумачыў гэта так:

«Вострай неабходнасці ў прыняцці вялікай колькасці ўцекачоў у нас няма. Няма і дастатковых умоваў для таго, каб прымаць вялікую колькасць уцекачоў».

Акрамя таго, у заканадаўстве існуе тэрмін «неспрыяльныя ў міграцыйным плане краіны».

«Няма яго вызначэння нідзе, няма спісу гэтых краін, нідзе ніякага дадатковага дадатку да закону ці нейкай пастановы пра гэтыя краіны. Але гэта падстава для адмовы ў выдачы запрашэння», – кажа Эніра Браніцкая з праваабарончай арганізацыі Human Constanta.

На веснавой сесіі беларускія парламентарыі будуць разглядаць змены ў Закон аб прававым становішчы замежных грамадзянаў. Адмыслоўцы спадзяюцца, што панятак пра неспрыяльныя для міграцыі краіны будзе выкраслены.

Наста Кахановіч, belsat.eu

Глядзі таксама
Каментары