У Менску амаль месяц працуе крама, дзе можна набыць тавары без упакоўкі, а таксама шматразовыя рэчы.
«Гэтая зубная шчотка называецца «Місфак», яна робіцца з каранёў дрэва Сальвадора. Паста не патрэбная, і шчотка таксама не патрэбная, гэта два ў адным. Шчотка плюс паста, але без пасты», – паказвае Аліна Сцяцова сваю эка-шчотку.
Аліна імкнецца да экалагічнага ладу жыцця. Яна намагаецца выкарыстоўваць як мага менш тавараў хімічнай вытворчасці. Замест пральнага парашку – арэхі. Замест звычайных жаночых гігіенічных сродкаў – менструальная чаша.
«Яны робяцца з медычнага сілікону, але ж ёсць латэксныя і з тэрмапластычнага эластамеру. Перад тым, як яе выкарыстоўваць, ты стэрылізуеш яе ў гарачай вадзе, 5 хвілін яна кіпяціцца пры 100 градусах. І ўсё, і потым ёй карыстаешся», – расказвае Аліна.
Дзяўчына таксама мае кубак-тэрмас і тканую торбачку.
Шматразовыя лёзы, тканыя мяшэчкі ды арганічная касметыка. У Менску запрацавала крама «Zerro». Пераважная большасць тавараў – айчыннае вытворчасці.
«Адныя з самых папулярных тавараў – вось такія спонжы для дэмакіяжу. Яны замяняюць звычайныя ватныя дыскі. Праблемаў з ватнымі дыскамі нямала: пры адбельванні выкарыстоўваецца хімічная вытворчасць, якая шкодзіць і нашай скуры«, – расказвае сузаснавальніца крамы «Zerro» Юлія Лісіца.
Два гады таму Юлія на свае вочы пабачыла смеццевы палігон. Пасля гэтага вырашыла адкрыць краму тавараў без пластыка.
«Даволі нечакана, што пакупнікі і пакупніцы не толькі з нашага сегменту вузкага, з экалагічнага кола, гэта яшчэ і людзі, якія нейкім чынам зацікаўленыя ў экалагічным ладзе жыцця, у здаровым ладзе жыцця і проста пра нас даведваюцца з «Інстаграму», – кажа Юлія.
Ці гатовыя менчукі пераплачваць за экалагічныя тавары ды набываць даражэйшыя шматразовыя рэчы замест танных і зручных аднаразовых?
«Гэта вельмі складана, мы ўжо прывыклі да гэтага, ну калі трэба, то будзем канешне пакрысе», – кажуць жыхары Менску.
«Гатовыя набываць, таму што ўсе гэтыя аднаразовыя, гэта ўсё, гэта забруджванне навакольнага асяроддзя», – адзначаюць мінакі.
«Ну, напрыклад, менструальная чаша – гэта рэч, якая ў мяне ёсць. Я стараюся карыстацца такімі торбамі, напрыклад, шматразовымі замест пластыкавых пакетаў», – заяўляюць менчукі.
На пачатку сакавіка кіраўнік Беларусі падпісаў дырэктыву нумар 7. У дакуменце сярод іншага прадугледжваецца паэтапнае зніжэнне пакавання з пластыку і замена яго папяровым і шкляным.
Каб зменшыць колькасць аднаразовых пластыкавых упаковак, можна скарыстацца аўтаматамі з бытавой хіміяй. Працуе вельмі проста: трэба прыйсці са сваёй шматразовай тарай, закінуць грошы, і вось ужо наліваецца вадкі сродак для сцірання вопраткі.
Сярэднестатыстычны беларус пакідае больш за 300 кілаграмаў смецця штогод. Зменшыць гэтую лічбу можна самастойна: выкарыстоўваць тканыя торбы ды імкнуцца набываць тавары ў пакаванні, што перапрацоўваецца.
Наста Кахановіч, Белсат