Роўна тыдзень Святлана Ціханоўская сустракаецца з выбарцамі ў рэгіёнах. Сёння кандыдатка на прэзідэнцтва наведала Воршу, Магілёў і Бабруйск. Як яе сустракаюць у рэгіёнах людзі, і як на сустрэчы рэагуюць улады?
Тры тысячы асобаў, бел-чырвона-белыя сцягі. Магілёўцы вітаюць жаночае трыа: кандыдатку на прэзідэнцтва Святлану Ціханоўскую і прадстаўніц незарэгістраваных прэтэндэнтаў, Вераніку Цапкалу ды Марыю Калеснікаву. За што выступаюць удзельнікі мітынгу?
«Хочацца элементарнай свабоды слова! Калі ты маеш іншае меркаванне, а цябе за гэта саджаюць на «содні» – гэта ненармальна!»
«Някляеў казаў: «Они украли у нас страну, украли речи нашей звуки». Я беларус, а размаўляю па-расейску. Чаму? Таму, што не давалі мне вывучыць гэтую мову нармальна».
«Заклікаю ўсіх падтрымліваць Святлану Ціханоўскую. Жыве Беларусь!» – кажуць жыхары Магілёва.
Дзяржынск, Менск, Глыбокае, Наваполацк, Віцебск – у кожным горадзе, які наведала Святлана Ціханоўская на працягу тыдня, збіраліся тысячы людзей. Шматлікі мітынг трыа сабрала і ў Воршы. Чаго чакаюць жыхары гораду?
«Змены ўлады. Мне гэтага будзе дастаткова. Я не ведаю, што будзе з новай уладай – будзе лепш ці горш, але будзе па-іншаму!»
«Дзе тыя 500 долараў у працоўнага чалавека? Іх няма! Адныя абяцанні! Я хачу, каб народ адчуў гэта ўсё!»
«Мы так прайшлі – прыблізна тысячы тры ёсць! Мы вельмі радыя, што ў наш горад прыехалі! Мы адклалі ўсе справы, якія былі!» – прызнаюцца аршанцы.
Як жа на палітычную актыўнасць у рэгіёнах рэагуюць улады?
«Гэта вы ў нашай краіне знайшлі самага галоўнага эканамічнага злачынцу? Маёр міліцыі, старэйшы лейтэнант, цэлы атрад міліцыі!» – абураюцца грамадскія актывісты з Крупак Аляксандр і Ганна Бандарэнкі.
Іх сына ўзброеныя міліцыянты забралі ў Барысаўскі РАУС. Сілавікі заявілі, што 18-гадовы Ілля падаў у БДУ падробленую даведку.
«Мы ім кажам: вазьміце на месцы сведчанні, навошта дзіця забіраць?! Мы зачынілі яго ў залі на замок, а гэтыя галаварэзы хацелі ўжо сілай ламаць замок, пакуль не прыйшоў маёр», – распавядае Аляксандр Бандарэнка.
За Іллём Бандарэнкам у райаддзел паехалі бацькі і сястра Кацярына. Яна – сябра ініцыятыўнай групы Святланы Ціханоўскай. Уся сям‘я атрымала павесткі з патрабаваннем з’явіцца ў РАУС заўтра.
Акурат заўтра каманда Святланы Ціханоўскай мае правесці ў Крупках пікет. Сама кандыдатка на прэзідэнцтва наведае Магілёў і Жлобін.
Аляксандр Папко, «Белсат»
